ఒంటిమిట్ట ఉత్స‌వాల‌కు సిద్దం కండి
పిలుపునిచ్చిన టీటీడీ జేఈవో వీర‌బ్ర‌హ్మం
తిరుమ‌ల – ఈ ఏడాది ఏప్రిల్ లో జ‌రిగే ఒంటిమిట్ట శ్రీ కోదండ రామాల‌య బ్ర‌హ్మోత్స‌వాలు ఘనంగా నిర్వహించేందుకు ఏర్పాట్లు ముమ్మరం చేయాలని టీటీడీ జేఈవో వీర‌బ్ర‌హ్మం అధికారులను ఆదేశించారు. బ్రహ్మోత్సవాల ఏర్పాట్లపై త‌న కార్యాల‌యంలో స‌మీక్ష చేప‌ట్టారు.
ఈ సందర్భంగా జేఈవో మాట్లాడుతూ టీటీడీ ఆగమ సలహాదారులను సంప్రదించి బ్రహ్మోత్సవాలకు అవసరమైన బుక్ లెట్ ను, శ్రీ సీతారాముల కల్యాణం ముహూర్త పత్రికను సిద్ధం చేయాలని సూచించారు. ఇంజినీరింగ్ విభాగం ఆధ్వర్యంలో కల్యాణ వేదిక వద్ద బారికేడ్లు, క్యూలైన్లు, గ్యాలరీలు, రూట్ మ్యాప్ సిద్ధం చేయాలన్నారు.
గ్యాలరీల్లోని భక్తులకు తలంబ్రాలు, అన్నప్రసాదాలు, తాగునీరు అందించేందుకు సర్వీస్ రూట్ ఏర్పాటు చేయాలని స్ప‌ష్టం చేశారు. గ్యాలరీలోని భక్తులందరికీ అన్న ప్రసాదాలు సక్రమంగా అందేలా ప్రణాళికలు రూపొందించాలని సూచించారు. మెరుగైన పారిశుద్ధ్యం కోసం ప్రత్యేకంగా కార్యాచరణ రూపొందించాలని, తాత్కాలిక మరుగుదొడ్లు ఏర్పాటు చేయాలని ఆదేశించారు.
ఆలయం, కళ్యాణ వేదిక వద్ద శోభాయమానంగా విద్యుత్ దీపాలంకరణలు ఏర్పాటు చేయాలన్నారు. వైద్య బృందాలను అందుబాటులో ఉంచాలని స్ప‌ష్టం చేశారు జేఈవో. హిందూ ధర్మ ప్రచార పరిషత్ ఆధ్వర్యంలో సాంస్కృతిక కార్యక్రమాలు, శోభాయాత్ర నిర్వహించాలని సూచించారు.
