బాల‌య్య నామినేష‌న్ దాఖ‌లు

కూట‌మి త‌ర‌పున ద‌ర‌ఖాస్తు

అనంత‌పురం జిల్లా – ప్ర‌ముఖ న‌టుడు, తెలుగుదేశం పార్టీ హిందూపురం నియోజ‌క‌వ‌ర్గం సిట్టింగ్ ఎమ్మెల్యే నంద‌మూరి బాల‌కృష్ణ శుక్ర‌వారం టీడీపీ కూట‌మి త‌ర‌పున నామినేష‌న్ దాఖ‌లు చేశారు. ఆయ‌న వెంట జ‌న‌సేన‌, బీజేపీకి చెందిన నేత‌లు ఉన్నారు. నామినేష‌న్ దాఖ‌లు సంద‌ర్బంగా భారీ ఎత్తున జ‌నం పోగ‌య్యారు. బాల‌య్య బాబుకు ఘ‌న స్వాగ‌తం ప‌లికారు.

నామినేష‌న్ దాఖ‌లు సంద‌ర్బంగా గ‌ట్టి బందోబ‌స్తు ఏర్పాటు చేశారు. ఎన్నిక‌ల సంఘం రూల్స్ కు అనుగుణంగా కేవ‌లం అభ్య‌ర్థి నామినేష‌న్ దాఖ‌లు చేసే స‌మ‌యంలో ఐదుగురికి మాత్ర‌మే అవ‌కాశం ఉంటుంది.

నామినేష‌న్ దాఖ‌లు చేసిన అనంత‌రం నంద‌మూరి బాల‌కృష్ణ మీడియాతో మాట్లాడారు. రాష్ట్రంలో జ‌గ‌న్ రెడ్డి రాచ‌రిక పాల‌న‌కు చ‌ర‌మ గీతం పాడాల్సిన స‌మ‌యం ఆస‌న్న‌మైంద‌న్నారు. త‌న గెలుపును ఎవ‌రూ ఆప లేర‌న్నారు. గ‌త కొన్నేళ్లుగా హిందూపురం ప్ర‌జ‌లు త‌నను క‌డుపులో పెట్టుకున్నార‌ని కొనియాడారు.

వారి గురించి ఎంత చెప్పినా త‌క్కువేన‌ని పేర్కొన్నారు. త‌మ కూట‌మి ప‌వ‌ర్ లోకి వ‌చ్చాక ప్ర‌జా రంజ‌క పాల‌న సాగుతుంద‌న్నారు నంద‌మూరి బాల‌కృష్ణ‌.