VijayaBhaskar
హైద‌రాబాద్ : ప్రచారానికి నిధులు సమకూర్చుకోవడానికి కాంగ్రెస్ తెలంగాణను ఏటీఎంగా మార్చిందని ఈజేపీ రాష్ట్ర అధ్యక్షుడు రామచందర్ రావు ఆరోపించారు. పార్టీ కార్యాలయంలో జరిగిన బీజేపీ కార్యవర్గ సమావేశంలో ఆయన మాట్లాడారు. ప్రపంచం భారతదేశ ప్రజాస్వామ్యం, ఎన్నికల ప్రక్రియ పట్ల గర్వ పడుతుండగా కాంగ్రెస్ మాత్రం దేశంపైనా, ఎన్నికల సంఘంపైనా అసంబద్ధమైన, నిరాధారమైన ఆరోపణలు చేయ‌డం దారుణ‌మ‌న్నారు. ఢిల్లీలో తమ ప్రచారానికి నిధులు సమకూర్చుకోవడానికి కాంగ్రెస్ పార్టీ రాష్ట్రాన్ని ఒక ఏటీఎంగా మార్చిందని బీజేపీ అధ్యక్షుడు సోమవారం ఆరోపించారు. ఒక సాధారణ చాయ్‌వాలా దేశ ప్రధానమంత్రి అయ్యాడనే నిజాన్ని ఆ పార్టీ జీర్ణించు కోలేక పోతోందని ఆయన వ్యాఖ్యానించారు. నెహ్రూ కుటుంబానికి చెందిన వారే ఆ పదవిలో ఉండాలనే సంకుచిత భావనతో కాంగ్రెస్ జాతీయ అధ్యక్షుడు మల్లికార్జున్ ఖర్గే, దేశంలో జరిగిన ఎన్నికలు చెల్లవని వాదించడం సిగ్గుచేటని రావు అన్నారు.
కాంగ్రెస్‌కు సవాలు విసురుతూ ఎన్నికలు నిజంగా చెల్లవని వారు విశ్వసిస్తే, ముందుగా తెలంగాణ, కేరళ, హిమాచల్ ప్రదేశ్ ముఖ్యమంత్రులు తమ పదవులకు రాజీనామా చేయాలని రామచందర్ రావు డిమాండ్ చేశారు. కాంగ్రెస్ తిరోగమన రాజకీయ ప్రవర్తనను ఆయన తీవ్రంగా విమర్శించారు. గెలిచినప్పుడు ఈవీఎంలను, ఎన్నికల సంఘాన్ని పొగుడుతారని, ఓడిపోయినప్పుడు నిందిస్తారని పేర్కొన్నారు. గత కాంగ్రెస్ హయాంలో అక్రమ చొరబాటుదారులు చట్టవిరుద్ధ మార్గాల ద్వారా రేషన్ కార్డులు పొంది, ఓటర్ల జాబితాలో తమ పేర్లను నమోదు చేసుకున్నారని రామచందర్ రావు పేర్కొన్నారు. భారత రాజ్యాంగం ప్రకారం దేశంలోని ప్రతి పౌరుడికి ఓటు హక్కు ఉన్నప్పటికీ, బంగ్లాదేశ్, బర్మా వంటి దేశాల నుంచి అక్రమంగా ప్రవేశించిన విదేశీయులకు ఈ హక్కు లేదని ఆయన స్పష్టం చేశారు.
