శ్రీవారి ఆలయంపై ఈవో సమీక్ష
భక్తులకు ఇబ్బందులు ఉండ కూడ‌దు
తిరుమల – తిరుమల శ్రీ వేంకటేశ్వర ఆలయం, చరిత్ర, వాస్తు శిల్పం, విశిష్టత, అనేక ఇతర సంబంధిత విశేషాలపై టీటీడీ ఈవో జె.శ్యామలరావు సవివరంగా సమీక్షించారు.
తిరుమలలోని గోకులం విశ్రాంతి భవనంలో జరిగిన సమీక్షా సమావేశంలో జేఈవోలు గౌతమి, వీరబ్రహ్మం తదితరులు పాల్గొన్నారు.
ఈ సందర్భంగా ఆలయ అధికారులు పవర్ పాయింట్ ప్రజెంటేషన్‌ ద్వారా తిరుమల శ్రీవారి ఆలయ చరిత్ర, వైఖానస ఆగమ, జీయంగార్ వ్యవస్థ, వివిధ ఆచార వ్యవహారాలు, నిత్య, వార, మాస, వార్షిక సేవా కార్యక్రమాలు, సుప్రభాతం నుంచి ఏకాంతం వరకు ప్రతి రోజు శ్రీ వేంకటేశ్వర స్వామికి నిర్వహించే వివిధ కైంకర్యాలను సవివరంగా ఈవోకు వివరించారు.
తరువాత ఆయన ఉదయం సేవలు, విఐపి దర్శనం, సర్వ దర్శనం, ఆర్జిత సేవలు, ఇతర దర్శనాలను కూడా సమీక్షించారు.
భక్తులకు కల్పిస్తున్న వివిధ రకాల దర్శనాలు, ఇందుకు సంబంధించిన దర్శన సమయము, ఏ దర్శనానికి ఎంత సమయం పడుతోంది తదితర అంశాలపై సవివరంగా తనకు నివేదిక పంప వలసిందిగా ఆలయ డిప్యూటీ ఈవో లోకనాథంను ఆదేశించారు.
