హనుమంత వాహనంపై సుందరరాజ స్వామి
భక్తులకు ద‌ర్శ‌నం ఇచ్చిన స్వామి వారు
తిరుపతి – తిరుచానూరు శ్రీ పద్మావతి అమ్మవారి ఆలయానికి అనుబంధంగా ఉన్న శ్రీ సుందరరాజ స్వామివారి అవతార మహోత్సవాల్లో భాగంగా రెండో రోజు శుక్రవారం రాత్రి హనుమంత వాహనంపై స్వామివారు భక్తులను కటాక్షించారు.
ఈ సందర్భంగా మధ్యాహ్నం శ్రీ కృష్ణ స్వామివారి ముఖ మండపంలో శ్రీ సుందరరాజ స్వామివారికి వైభవంగా అభిషేకం చేశారు. ఇందులో పాలు, పెరుగు, తేనె, కొబ్బ‌రినీళ్ళు, పసుపు, చందనాల‌తో వేడుకగా అభిషేకం నిర్వహించారు.
సాయంత్రం శ్రీకృష్ణస్వామి వారి ముఖమండపంలో ఊంజల్‌ సేవ నిర్వహించారు. రాత్రి స్వామి వారి హనుమంత వాహన సేవ వైభవంగా జరిగింది.
కాగా శనివారం రాత్రి స్వామి వారు గరుడ వాహనాన్ని అధిరోహించి భక్తులకు దర్శనమిస్తారు. ఈ కార్యక్రమంలో ఆల‌య డిప్యూటీ ఈవో గోవింద రాజన్, సూపరిటెండెంట్ మధు, టెంపుల్ ఇన్స్పెక్టర్లు సుభాష్, శ్రీ గణేష్, అర్చ‌కులు బాబుస్వామి, ఇతర అధికారులు పాల్గొన్నారు.
