9 నుండి శ్రీ పట్టాభిరామ స్వామి మహోత్సవాలు
11వ తేదీ వరకు జ‌రుగుతాయ‌న్న టీటీడీ
తిరుమ‌ల – తిరుమ‌ల తిరుప‌తి దేవ‌స్థానం (టీటీడీ) కీల‌క ప్ర‌క‌ట‌న చేసింది. వాల్మీకి పురంలోని ప్ర‌సిద్ది చెందిన శ్రీ పట్టాభిరామ స్వామి వారి పట్టాభిషేక మహోత్సవాలు ఆగస్టు 9 నుండి 11వ తేదీ వరకు వైభవంగా జరుగుతాయ‌ని తెలిపింది. ఆగస్టు 9న అంకురార్పణంతో ఉత్సవాలు ప్రారంభం కానున్నాయి. మొదటి రోజు సేనాధిపతి ఉత్సవం జరుగనుంది.
ఆగస్టు 10వ తేదీన ఉదయం యాగశాల పూజ, స్నపన తిరుమంజనం నిర్వహిస్తారు. సాయంత్రం 5 గంటలకు ఊంజల్‌సేవ, 6.30 గంటలకు శ్రీ సీతారామ శాంతి కళ్యాణం, రాత్రి 8 గంటలకు హనుమంత వాహన సేవ నిర్వహించనున్నారు.
ఆగస్టు 11న ఉదయం యాగశాల పూజ, స్నపన తిరుమంజనం నిర్వహిస్తారు. అనంతరం శ్రీరామ పట్టాభిషేక మహోత్సవం కన్నుల పండువగా జరుగనుంది. సాయంత్రం 6 గంటలకు ఊంజల్‌ సేవ, రాత్రి 8 గంటలకు గరుడ వాహనంపై శ్రీ పట్టాభిరాముడు విహరించి భక్తులకు దర్శన భాగ్యం కల్పిస్తారు.
గృహస్తులు (ఇద్దరు) రూ.300/- చెల్లించి శ్రీరామ పట్టాభిషేకం ఆర్జిత సేవలో పాల్గొనవచ్చు. గృహస్తులకు ఒక ఉత్తరీయం, ఒక రవికె, అన్న ప్రసాదం బహుమానంగా అందజేస్తారు.
ఈ మూడు రోజుల పాటు టీటీడీ హిందూ ధర్మప్రచార పరిషత్‌, అన్నమాచార్య ప్రాజెక్టుల ఆధ్వర్యంలో హరికథలు, భజనలు, ఆధ్యాత్మిక భక్తి సంగీత కార్యక్రమాలు జరుగనున్నాయి.
