స్కిల్ యూనివర్సిటీ చైర్ పర్సన్‌గా ఆనంద్ మహీంద్రా
కో-చైర్మన్‌గా ఆంధ్రాకు చెందిన శ్రీ‌నివాస రాజు
హైద‌రాబాద్ – తెలంగాణ రాష్ట్ర ప్రభుత్వం కీల‌క నిర్ణ‌యం తీసుకుంది. సీఎం ఎ. రేవంత్ రెడ్డి ఆదేశాల మేర‌కు ప్ర‌ముఖ వ్యాపార‌వేత్త ఆనంద్ మ‌హీంద్రాకు కీల‌క బాధ్య‌త‌లు అప్ప‌గించింది. ఈ మేర‌కు ఉత్త‌ర్వులు జారీ చేసింది.
ప్రజా ప్రభుత్వం ప్రతిష్టాత్మకంగా ప్రారంభించిన “తెలంగాణ యంగ్ ఇండియా స్కిల్ యూనివర్సిటీ” బోర్డ్ ఆఫ్ గవర్నర్స్ చైర్ పర్సన్‌గా మహీంద్రా గ్రూపు సంస్థల చైర్మన్ ఆనంద్ మ‌హీంద్రాను నియమించింది.
మహీంద్రాతో పాటు ఆంధ్రప్ర‌దేశ్ రాష్ట్రానికి చెందిన విద్యా వేత్త శ్రీ‌నివాస రాజుకు అంద‌లం ఎక్కించింది. ఈ యూనివర్సిటీకి బోర్డ్ ఆఫ్ గవర్నర్స్ సభ్యుడిగా, కో-చైర్మన్ హోదాలో నియమించింది. వీరు ఏడాది పాటు పదవిలో కొనసాగుతారని ప్రభుత్వం ఉత్తర్వుల్లో పేర్కొంది.
ఆనంద్ మహీంద్రా అటోమొబైల్, ఏయిరోస్పేస్, డిఫెన్స్, ఎనర్జీ, ఐటీ వంటి రంగాల్లో ప్రఖ్యాతిగాంచిన మహీంద్రా గ్రూపు సంస్థలకు చైర్మన్‌గా ఉన్నారు.
హార్వర్డ్ బిజినెస్ స్కూల్ (ఆసియా-ఫసిఫిక్ అడ్వయిజరీ బోర్డు), హార్వర్డ్ గ్లోబల్ అడ్వయిజరీ కౌన్సిల్ అడ్వయిజరీ కమిటీ, ఆసియా బిజినెస్ కౌన్సిల్ వంటి అనేక ప్రతిష్టాత్మక సంస్థలకు సభ్యుడిగా ఉన్నారు. పద్మభూషణ్ తో పాటు ఆయన అనేక అవార్డులు అందుకున్నారు.
రేవంత్ రెడ్డి ఇటీవల ఆనంద్ మహీంద్రాతో సమావేశమైన సందర్భంగా స్కిల్ యూనివర్సిటీ ఏర్పాటు, లక్ష్యాలను వివరించి దానికి చైర్ పర్సన్ గా కొనసాగాలను కోరారు. ప్రభుత్వ ప్రైవేటు భాగస్వామ్యంతో స్కిల్ ఇండియా యూనివర్సిటీని ఏర్పాటు చేస్తూ ఇటీవలే అసెంబ్లీలో బిల్లు ఆమోదం పొందింది.
