శ్రీ తిరుమలనంబి జీవితం భ‌గ‌వంతుడికి అంకితం
శ్రీమాన్‌ శ్రీవణ్‌ శఠగోప రంగనాథ యతీంద్ర మహాదేశికన్‌ స్వామి
తిరుమ‌ల – భగవంతుడి సేవే ప‌ర‌మావ‌ధిగా భావించి శ్రీ తిరుమలనంబి జీవితం మొత్తాన్ని శ్రీవారి కైంక‌ర్యానికి అంకితం చేశార‌ని శ్రీమాన్‌ శ్రీవణ్‌ శఠగోప రంగనాథ యతీంద్ర మహాదేశికన్‌ స్వామి అన్నారు. ప్రముఖ వైష్ణవాచార్యులు శ్రీ తిరుమలనంబి 1051వ అవతార మహోత్సవం తిరుమలలోని దక్షిణ మాడ వీధిలో గల శ్రీ తిరుమలనంబి ఆలయంలో ఘనంగా జ‌రిగింది.
ఈ కార్య‌క్ర‌మానికి విచ్చేసిన శ్రీమాన్‌ శ్రీవణ్‌ శఠగోప రంగనాథ యతీంద్ర మహాదేశికన్‌ స్వామి అనుగ్ర‌హ‌భాష‌ణం చేశారు.
శ్రీ తిరుమలనంబి తన తాతగారు అయిన శ్రీ యమునాచార్యుల ఆజ్ఞతో తిరుమలకు వచ్చి పాపవినాశనం తీర్థం నుండి ప్రతిరోజూ జలాన్ని తీసుకువ‌చ్చి శ్రీవారిని అభిషేకం చేసే వార‌ని అన్నారు. వృద్ధాప్యంలో కూడా పాపనాశనం తీర్థం నుండి తీసుకు వస్తున‌ప్పుడు స్వామి వారు జాలిపడి అంజనాద్రిలో ఉద్భవింప చేసిన ఆకాశగంగ తీర్థంతో అభిషేకం చేయవలసిందిగా ఆజ్ఞాపించినట్లు పురాణాల ద్వారా తెలుస్తోందన్నారు.
సాక్షాత్తు భ‌గ‌వంతుడు ఉప‌దేశించిన భ‌గ‌వ‌ద్గీత‌లోని 700 శ్లోకాల‌ను సంగ్ర‌హించి శ్రీ య‌మునాచార్యులు 32 శ్లోకాల‌తో గీతార్థ సంగ్ర‌హం పేరుతో గ్రంథం ర‌చించార‌ని చెప్పారు. ఈ శ్లోకాలు బ్ర‌హ్మ విద్య‌తో స‌మాన‌మైన‌వ‌ని కొనియాడారు.
అనంతరం టీటీడీ అదనపు ఈవో సిహెచ్ వెంకయ్య్య చౌదరి మాట్లాడుతూ, శ్రీవేంకటేశ్వర స్వామి వారికి తీర్థ కైంకర్యం చేసిన తిరుమ‌ల ప్ర‌థ‌మ పౌరుడు శ్రీ తిరుమలనంబి అని అన్నారు. శ్రీవారి కైంకర్యాలు చేసేందుకు శ్రీ తిరుమలనంబి 973వ సంవత్సరంలో తిరుమలకు చేరుకున్నారని తెలిపారు.
తిరుమలనంబి స్వామి వారికి పుష్ప కైంకర్యం, మంత్ర పుష్ప కైంకర్యం, వేద పారాయ‌ణ కైంకర్యం, ఇతర కైంకర్యాలను చేస్తూ తిరుమలలో ఉంటూ అపర భక్తుడిగా నిలిచాడని చెప్పారు.
శ్రీవారి వైభవాన్ని నలుదిశలా చాటడానికి కృషి చేసిన పరమ భక్తుల జన్మదినాల సందర్భంగా ప్రతి సంవత్సరం వారి పేరుపై ఉన్న ఉప ఆలయాల్లో వార్షికోత్సవాలు టీటీడీ నిర్వహించడం ఆనవాయితీగా వస్తోందన్నారు.
అనంతరం ఆంధ్ర, తెలంగాణ, త‌మిళ‌నాడు, క‌ర్నాట‌క, కేర‌ళ రాష్ట్రాల నుండి విచ్చేసిన 16 మంది ప్రముఖ పండితులు శ‌ర‌ణాగ‌తి త‌త్వాన్ని గురించి ప్ర‌సంగించారు.
ఈ కార్యక్రమంలో టీటీడీ ధార్మిక ప్రాజెక్టుల ప్రోగ్రాం అధికారి రాజ‌గోపాల్‌, ఆళ్వార్‌ దివ్య ప్రబంధ ప్రాజెక్టు ప్రోగ్రాం అధికారి పురుషోత్తం, శ్రీ తిరుమలనంబి వంశీకులు శ్రీ తాతాచార్య కృష్ణమూర్తి, శ్రీ సి.రంగనాథన్‌, ఇతర అధికారులు, అర్చకులు పాల్గొన్నారు.
