కలాం జీవితం ఆద‌ర్శ ప్రాయం – సీఎం
జాతి మ‌రిచి పోని మిస్సైల్ మ్యాన్
అమ‌రావ‌తి – డాక్ట‌ర్ ఏపీజే అబ్దుల్ కలాం జీవితం ఆద‌ర్శ ప్రాయమ‌ని పేర్కొన్నారు ఏపీ సీఎం నారా చంద్ర‌బాబు నాయుడు. అక్టోబ‌ర్ 15న కలాం జ‌యంతి సంద‌ర్బంగా ఎక్స్ వేదిక‌గా నివాళులు అర్పించారు. ఈ సంద‌ర్బంగా క‌లాంతో త‌న‌కు ఉన్న అనుబంధాన్ని గుర్తు చేసుకున్నారు సీఎం.
నిరంతర శ్రమతో ఉన్నత శిఖరాలు అధిరోహించి, భారతదేశ ఖ్యాతిని ప్రపంచానికి చాటిన మహనీయుడు అని కొనియాడారు. దేశం కోసం తన జీవితాన్ని అంకితం చేసిన కలాం జీవితం ఎల్లప్పుడూ దేశ ప్రజలకు స్ఫూర్తిదాయకంగా ఉంటుంద‌ని పేర్కొన్నారు నారా చంద్ర‌బాబు నాయుడు.
ఆయ‌న చేసిన సేవ‌ల‌ను గుర్తు చేసుకున్నారు. మిస్సైల్ మ్యాన్ గా ఎల్ల‌ప్ప‌టికీ ఈ దేశం గుర్తు పెట్టుకుంటుంద‌ని అన్నారు. కలాం వినయం, దృష్టి, జ్ఞానం , విద్య పట్ల అచంచలమైన అంకితభావం లక్షలాది మంది హృదయాలలో చెరగని ముద్ర వేసింద‌ని పేర్కొన్నారు. కలాం వారసత్వం మానవాళికి ఆశాజ్యోతిగా, తరతరాలకు స్ఫూర్తిగా కొనసాగుతూనే ఉంటుంద‌ని స్ప‌ష్టం చేశారు.
అభివృద్ధి చెందిన భారతదేశం రూపొందించ‌డంలో, క‌ల‌ల్ని సాధించడంలో కలాం దార్శనికత , ఆలోచనలు ఎంత‌గానో ఉప‌యోగ ప‌డ్డాయ‌ని ప్ర‌శంస‌లు కురిపించారు . అంతే కాదు భారతదేశాన్ని పటిష్టంగా, సుసంపన్నంగా, సమర్ధవంతంగా మార్చేందుకు తన జీవితాన్ని అంకితం చేశారని కొనియాడారు.
