శ్రీ కోదండరామ స్వామికి పవిత్ర సమర్పణ
చంద్రగిరిలో అంగ‌రంగ వైభవంగా పూజ‌లు
తిరుప‌తి – చిత్తూరు జిల్లాలోని అత్యంత ప్ర‌సిద్ది చెందిన చంద్రగిరి శ్రీ కోదండ రామ స్వామి వారి ఆలయ పవిత్రోత్సవాల్లో భాగంగా రెండో రోజ పవిత్ర సమర్పణ వైభవంగా జరిగింది. ఇందులో భాగంగా ఉదయం 6 గంటలకు స్వామి వారిని సుప్రభాతంతో మేల్కొలిపి కొలువు నిర్వహించారు.
అనంతరం సీతా లక్ష్మణ సమేత శ్రీ రాముల వారి ఉత్సవర్లను యాగశాలకు వేంచేపు చేశారు. అక్కడ ద్వార పూజ, కుంభారాధన, హోమం, ల‌ఘు పూర్ణాహుతి నిర్వహించారు.
ఉదయం 9.30 గంటల నుండి యాగశాలలో పవిత్ర మాలలకు ఉపచారాలు నిర్వహించి ప్రదక్షిణగా సన్నిధికి వేంచేపు చేశారు. అనంతరం మూలవర్లకు, ఉత్స‌వ‌ర్ల‌కు, 12 మంది ఆళ్వార్లు, శ్రీ భక్త ఆంజనేయ స్వామి వారు, శ్రీ విష్వక్సేనుల వారికి, శ్రీ గరుడాళ్వార్‌కు, యాగశాలలోని హోమ గుండాలకు, బలిపీఠానికి, ధ్వజ స్తంభానికి, విమాన గోపురానికి పవిత్రాలు సమర్పించారు.
సాయంత్రం 5.30 రాత్రి 7.30 గంటల వరకు ఆలయంలోని యాగశాలలో వైదిక కార్యక్రమాలు ఘ‌నంగా నిర్వహించారు. ఈ కార్యక్రమంలో ఆలయ సూపరిండెంట్ జ్ఞాన‌ప్ర‌కాష్‌, టెంపుల్‌ ఇన్‌స్పెక్టర్‌ హ‌రి, ఆలయ అర్చ‌కులు, ఇతర అధికారులు పాల్గొన్నారు.
