శ్రీ క‌పిలేశ్వ‌రాల‌యంలో పూజా మ‌హోత్స‌వాలు

న‌వంబరు 2 నుంచి డిసెంబరు 1వ తేదీ వరకు

తిరుప‌తి – పవిత్రమైన కార్తీక మాసాన్ని పురస్కరించుకుని లోక కల్యాణం కోసం తిరుపతి లోని శ్రీ కపిలేశ్వర స్వామి వారి ఆలయంలో న‌వంబరు 2 నుంచి డిసెంబరు 1వ తేదీ వరకు నెల రోజుల పాటు విశేషపూజ హోమ మహోత్సవాలు జరుగనున్నాయి. న‌వంబరు 2వ తేదీన హోమ మహోత్సవాలకు శాస్త్రోక్తంగా అంకురార్పణ జరుగనుంది.

నవంబరు 2 నుంచి 4వ తేదీ వరకు మొదటగా శ్రీగణపతి స్వామి వారి హోమం, నవంబరు 5 నుండి 7వ‌ తేదీ వ‌ర‌కు శ్రీ సుబ్రమణ్య స్వామి వారి హోమం, నవంబరు 8న శ్రీదక్షిణా మూర్తి స్వామి వారి హోమం, నవంబరు 9న శ్రీ నవ గ్రహ హోమం జరుగనున్నాయి.

అదే విధంగా నవంబరు 10 నుంచి 18వ తేదీ వరకు శ్రీ కామాక్షి అమ్మవా రిహోమం (చండీ హోమం), నవంబరు 19 నుంచి 29వ తేదీ వరకు శ్రీ కపిలేశ్వర స్వామి వారి హోమం (రుద్ర హోమం), నవంబరు 30న శ్రీకాల భైరవ స్వామి వారి హోమం, డిసెంబరు 1న శ్రీచండికేశ్వర స్వామి వారి హోమం, త్రిశూల స్నానం, పంచమూర్తుల తిరువీధి ఉత్సవం నిర్వహించనున్నారు.

గృహస్తులు (ఇద్దరు) రూ.500/- చెల్లించి ఒక రోజు హోమంలో పాల్గొనవచ్చు. గృహస్తులకు ఒక ఉత్తరీయం, ఒక రవికె, అన్నప్రసాదం అందజేస్తారు. ఈ హోమాల్లో పాల్గొనే గృహస్తులు కచ్చితంగా సంప్రదాయ వస్త్రధారణలో రావాల్సి ఉంటుంది.

ఈ హోమాల్లో భాగంగా నవంబరు 7న శ్రీ వళ్లి దేవసేన సమేత శ్రీ సుబ్రమణ్య స్వామి వారి కల్యాణం, నవంబరు 29న మాస శివరాత్రి నాడు శ్రీ శివ పార్వతుల కల్యాణోత్సవం జరుగనున్నాయి.

హోమ మహోత్సవాలకు విశేష ఆదరణ –

శ్రీ కపిలేశ్వరాలయంలో టీటీడీ నిర్వహిస్తున్న హోమ మహోత్సవాలకు భక్తుల నుంచి విశేష ఆదరణ లభిస్తోంది. 2012వ సంవత్సరంలో ఈ హోమాలను టీటీడీ ప్రారంభించింది. ఈ హోమాల్లో పాల్గొంటున్న భక్తుల సంఖ్య ప్రతి ఏడాదీ పెరుగుతోంది. ఈ హోమాలను సొంతంగా చేయించుకోవాలంటే ఖర్చుతో కూడుకున్న పని కావడంతో భక్తుల సౌకర్యార్థం సామూహికంగా ఈ హోమాలను టీటీడీ నిర్వహిస్తోంది.