కాసుల వ‌ర్షం కురిపిస్తున్న డెకాయిట్

తొలి రోజు నుంచే పాజిటివ్ టాక్

హైద‌రాబాద్ : న‌టుడు అడివి శేష్ నటించిన డెకాయిట్ చిత్రం బాక్సాఫీస్‌ వద్ద సంచలనాత్మకంగా ప్రారంభమైంది. యూఎస్‌ఏలో అర మిలియన్ డాలర్ల మార్కును అత్యంత వేగంగా దాటిన చిత్రంగా ఇది నిలిచింది. షానీల్ డియో దర్శకత్వం వహించిన ఈ లవ్-యాక్షన్ డ్రామా, విదేశాలలో బలమైన ప్రీమియర్ వసూళ్లతో ప్రారంభమై, మొదటి రోజు కూడా అదే అద్భుతమైన ప్రదర్శనను కొనసాగించింది. అడివి శేష్ గత చిత్రాల ఓపెనింగ్ కలెక్షన్లను సునాయాసంగా అధిగమించింది. ఈ చిత్రం యూఎస్‌ఏలో $575K+ వసూలు చేసింది. ఇదే జోరు కొన‌సాగుతోంది. సినిమా వసూళ్లు ఇంకా కొనసాగుతున్నాయి. మొత్తంగా, ఈ సినిమా ప్రపంచ వ్యాప్తంగా 15 కోట్లకు పైగా వసూలు చేసింది. అడివి శేష్ కెరీర్‌లో అతిపెద్ద ఓపెనర్‌గా నిలిచింది.

ఈ చిత్రం ప్రారంభం నుంచే బలమైన బజ్‌ను సృష్టించింది, అన్ని ప్రాంతాలలో ప్రేక్షకులు భారీ సంఖ్యలో తరలి వచ్చారు. తెలుగు రాష్ట్రాల్లో, ఉదయం షోలతో పోలిస్తే మధ్యాహ్నపు షోలకు రెట్టింపు మంది ప్రేక్షకులు హాజరు కావ‌డం విశేషం. ఆ తర్వాతి షోలలో కూడా ఇదే ధోరణి కొనసాగింది. బుక్‌మైషోలో ప్రీ-సేల్స్ ,మొదటి రోజు అమ్మకాలు కలిపి 250K టిక్కెట్ల అమ్మకాలను దాటాయి. హిందీలో ఈ సినిమా తన ప్రారంభ రోజున 1.25 కోట్ల రూపాయల చెప్పుకోదగ్గ వసూళ్లను రాబట్ట‌డంతో మూవీ మేక‌ర్స్ సంతోషంలో మునిగి తేలుతున్నారు.