ఆదుకోవాలని ఆదేశించిన రేవంత్ రెడ్డి
హైద‌రాబాద్ – కాలిన గాయాలతో లేవలేని స్థితిలో మంచానికే పరిమితమైన సలీమా ను ఆదుకోవాలని ముఖ్యమంత్రి రేవంత్ రెడ్డి అధికారులను ఆదేశించారు. తక్షణమే ఆమెకు తగిన వైద్య సహాయం అందించడంతో పాటు దివ్యాంగుల పింఛను ఏర్పాటు చేయాలని స్పష్టం చేశారు. ఇందిరమ్మ ఇళ్లు కూడా ఇవ్వాలని సీఎం అధికారులకు సూచించారు. భోజ‌న సదుపాయం క‌ల్పించాల‌న్నారు.
వంట చేసుకుని తినే పరిస్థితి లేకపోవడంతో ఆమెకు భోజనం సదుపాయం కూడా కల్పించాలని ముఖ్యమంత్రి రేవంత్ రెడ్డి స్పష్టం చేశారు. సూర్యాపేట జిల్లా నూతనకల్ మండలం గుండ్ల సింగారం గ్రామానికి చెందిన సలీమా దీన స్థితి పైన ఓ పత్రికలో వచ్చిన కథనంపై సీరియ‌స్ గా స్పందించారు.
ముఖ్యమంత్రి ఆదేశాలతో సీఎం ఓఎస్డీ వేముల శ్రీనివాసులు సూర్యాపేట జిల్లా కలెక్టర్ తో మాట్లాడారు. కాలిన గాయాల కారణంగా సలీమా నరాలు దెబ్బ తినడం తో ఆమె మంచానికే పరిమితమయ్యారు. దీంతో సలీమా పదేళ్ల కుమార్తె రిజ్వానా తల్లి కి సపర్యలు చేస్తోంది. ఒక వైపు తల్లి బాధ్యతలు చూసుకుంటూనే బడికి వెళ్లి చదువు కోవడం విశేషం.
ఈ సంద‌ర్బంగా సలీమా కూతురు రిజ్వానాను ప్ర‌త్యేకంగా అభినందించారు రేవంత్ రెడ్డి. అమ్మాయి చదువు బాధ్య‌త ప్ర‌భుత్వ‌మే తీసుకుంటుంద‌ని స్పష్టం చేశారు.
