టీటీడీకి సేంద్రియ ఎరువులు విరాళం
క్రియాజన్ అగ్రీ అండ్ బయోటెక్ కంపెనీ
తిరుపతి – తిరుపతికి చెందిన క్రియాజన్ అగ్రీ అండ్ బయోటెక్ కంపెనీ టీటీడీ అటవీ శాఖ ఆధ్వర్యంలో ఉన్న అటవీ, ఉద్యానవన సంరక్షణ కోసం రూ. 5 లక్షల విలువ గల 20 టన్నుల సేంద్రియ ఎరువులను విరాళంగా అందించింది. ఈ సంద‌ర్బంగా వారిని ప్ర‌త్యేకంగా అభినందించారు ఉప అటవీ సంరక్షణ అధికారి శ్రీ శ్రీనివాస్.
తిరుపతిలోని పంచాయతీరాజ్ ఛాంబర్ రాష్ట్ర ఉపాధ్యక్షులు సింగంశెట్టి సుబ్బరామయ్య చేతుల మీదుగా తిరుపతి అసిస్టెంట్ డైరెక్టర్ ఆఫ్ అగ్రికల్చర్ మనోహర్ బాబు, అగ్రికల్చరల్ ఆఫీసర్ ప్రపూర్ణ, కంపెనీ సిబ్బంది జనరల్ మేనేజర్ శ్రీనివాస్ అందజేశారు.
ఇదిలా ఉండ‌గా క‌లియుగ దైవంగా , కోరిన కోర్కెలు తీర్చే కొంగు బంగారంగా తిరుమ‌ల పుణ్య క్షేత్రం వెలుగొందుతోంది. కోట్లాది మంది భ‌క్తులు శ్రీ వేంక‌టేశ్వ‌ర స్వామిని నిత్యం కొలుస్తారు. త‌మ ఆరాధ్య దైవంగా భావిస్తారు. ఆయ‌న‌ను త‌లుచుకుంటే చాలు జీవితం ధ‌న్య‌మై పోతుంద‌ని న‌మ్ముతారు. ప్ర‌తి రోజూ వేలాది మంది స్వామి ద‌ర్శ‌న భాగ్యం కోసం సుదూర ప్రాంతాల నుంచి త‌ర‌లి వ‌స్తారు.
ప్ర‌తి నిత్యం భ‌క్తులు త‌మ‌కు తోచిన మేర‌కు కానుక‌లు, విరాళాలు రూపేణా శ్రీ‌వారి హుండీకి అంద‌జేస్తారు. టీటీడీ ఎన్నో కార్య‌క్ర‌మాల‌ను చేప‌డుతోంది. ప్ర‌త్యేకించి ల‌క్ష‌లాది మంది భ‌క్తుల ఆక‌లిని అన్న‌దానంతో తీరుస్తోంది. ఇందుకు సంబంధించి ట్ర‌స్టును ఏర్పాటు చేసింది. అన్న‌దానంతో పాటు విద్య, వైద్యం, వ‌స‌తి సౌక‌ర్యాల క‌ల్ప‌న, సంస్కృతిని ప‌రిర‌క్షించేందుకు విశ్వ విద్యాల‌యాన్ని ఏర్పాటు చేసింది.
