నోటిఫికేష‌న్ జారీ చేసిన గుంటూరు ఆర్మీ ఆఫీస‌ర్
అమ‌రావ‌తి – ఏపీలోని 13 జిల్లాల అభ్యర్థులకు బంప‌ర్ ఛాన్స్ ఇచ్చింది ఆర్మీ. గుంటూరు లోని ఆర్మీ చీఫ్ కీల‌క ప్ర‌క‌ట‌న చేశారు. ఏపీలోని 13 జిల్లాలకు చెందిన అభ్య‌ర్థుల కోసం అగ్నివీర్ సిబ్బందికి సంబంధించి నియామ‌కాలు చేప‌ట్టామ‌న్నారు. 2025-26 వ‌ర‌కు నమోదు ప్రారంభించామ‌న్నారు. వివిధ కేటగిరీల అగ్నివీర్ల నియామకం కోసం www.joinindianarmy.nic.in ద్వారా నమోదు చేసుకోవచ్చని తెలిపారు. నమోదుకు చివరి తేదీ 10 ఏప్రిల్ అని పేర్కొన్నారు. ఒక అభ్యర్థి ఇప్పుడు రెండు వేర్వేరు అగ్నివీర్ కేటగిరీలకు దరఖాస్తు చేసుకునే అవ‌కాశం కూడా క‌ల్పిస్తున్న‌ట్లు తెలిపారు.
ఆన్‌లైన్ ఉమ్మడి ప్రవేశ పరీక్ష (సీఈఈ) మొట్ట మొదటిసారిగా తెలుగుతో సహా 13 వేర్వేరు భాషల్లో నిర్వహించ నున్న‌ట్లు పేర్కొన్నారు. 1.6 కిలోమీటర్ల పరుగు సమయాన్ని 06 నిమిషాలు 15 సెకన్లకు పెంచడం జరిగిందన్నారు. అన్ని కేటగిరీలకు సంబంధించిన ఎన్‌సీసీ ‘ఎ’, ‘బి’ ‘సి’ సర్టిఫికెట్ కలిగిన వారికి, ప్రతిభావంతులైన క్రీడాకారులకు, అలాగే అగ్నివీర్ టెక్నికల్ కేటగిరీ కోసం ఐటిఐ/డిప్లొమా అర్హత కలిగిన అభ్యర్థులకు అదనపు మార్కులు కూడా ఇవ్వనున్న‌ట్లు స్ప‌ష్టం చేశారు ఆర్మీ ఆఫీస‌ర్.
ఆంధ్రప్రదేశ్‌లోని గుంటూరు, కర్నూలు, శ్రీ పొట్టి శ్రీరాములు నెల్లూరు, అనంతపురం, వైఎస్‌ఆర్ కడప, ప్రకాశం, చిత్తూరు, బాపట్ల, పలనాడు, నంద్యాల, తిరుపతి, అన్నమయ్య , శ్రీ సత్యసాయి జిల్లాలకు చెందిన ఆసక్తిగల అభ్యర్థులందరూ అగ్నివీర్ జనరల్ డ్యూటీ, అగ్నివీర్ టెక్నికల్, అగ్నివీర్ కార్యాలయ సహాయకులు/స్టోర్ కీపర్ టెక్నికల్, అగ్నివీర్ వృత్తి నిపుణుల పోస్టుల కోసం దరఖాస్తు చేసుకోవచ్చని తెలిపారు.
నియామక ప్రక్రియ పూర్తి పారదర్శకంగా ఉంటుందని. కావున, అగ్నివీర్‌గా సైన్యంలో నియామకం కోసం దళారులకు డబ్బులు చెల్లించ వ‌ద్ద‌ని కోరారు గుంటూరు ఆర్మీ రిక్రూటింగ్ ఆఫీస‌ర్ క‌ర్న‌ల్ పునీత్ కుమార్.
