కేసీఆర్ శ్రీకృష్ణ జన్మాష్టమి శుభాకాంక్షలు
శ్రీ‌కృష్ణుడి బోధనలు లోకానికి మార్గ‌ద‌ర్శ‌కాలు
హైదరాబాద్: శ్రీకృష్ణ జన్మాష్టమి సందర్భంగా తెలంగాణ రాష్ట్ర ప్రజలకు మాజీ ముఖ్యమంత్రి కే చంద్రశేఖర్ రావు శుభాకాంక్షలు తెలిపారు. శ్రీకృష్ణుని జన్మదినమైన జన్మాష్టమి హిందువులకు పవిత్రమైన రోజు అని కేసీఆర్ అన్నారు.
దేశంలోని ఆధ్యాత్మిక, సామాజిక, రాజకీయ రంగాల్లో గీతాచార్య తత్వశాస్త్రం, బోధనలు, ఆచరణ అత్యంత ప్రభావం చూపుతున్నాయని పేర్కొన్నారు. ఈ పవిత్రమైన రోజున దేశ ప్రజలకు దీవెనలు ప్రసాదించాలని ముఖ్యమంత్రి శ్రీకృష్ణుడిని ప్రార్థించారు.
మానవ జీవితంలో ‘గీత’ బోధనలు ప్రభావ శీలమైనవనీ, మానవుడి ప్రతి దశలోనూ కృష్ణ భగవానుడు కొలువై ఉంటారని అన్నారు. ఆ శ్రీకృష్ణ భగవానుడి కృపా కటాక్షాలు ప్రజలందరికీ అందాలని ప్రార్థిస్తున్నట్లు కేసీఆర్ ఒక సందేశంలో స్ప‌ష్టం చేశారు.
ఆ శ్రీకృష్ణ భగవానుడు మీ కుటుంబాన్ని ఆనందంతో, ఆరోగ్యంతో, ఐశ్వర్యంతో ఆశీర్వదించాలని మనసారా కోరుకుంటున్నాన‌ని తెలిపారు. గీతాసారంతో జీవిత సారం చెప్పిన శ్రీకృష్ణ పరమాత్ముడిని స్మరించు కోవడం అంటే మన కర్తవ్యాన్ని మనం గుర్తు చేసుకుని ముందుకు సాగడమేన‌ని స్ప‌ష్టం చేశారు మాజీ ముఖ్యమంత్రి.
ఏ విషయంలో అయినా మనకు స్ఫూర్తినిచ్చే శ్రీ కృష్ణ తత్వాన్ని సరిగ్గా అర్ధం చేసుకుంటే ప్రతి అంశంలో మనం విజయం సాధించవచ్చు అని పేర్కొన్నారు. కృష్ణాష్టమి సందర్భంగా ఆ నీల మేఘ శ్యాముని కృపా, కటాక్షం దేశంపై సదా ఉండాలని ప్రార్థిస్తున్నట్లు తెలిపారు.
