విశ్వ విజేత‌కు ప‌వ‌న్ కంగ్రాట్స్

ఏపీ డిప్యూటీ సీఎం ప‌వ‌న్ క‌ళ్యాణ్

అమ‌రావ‌తి – రెండవ సారి టీ20 ప్రపంచ కప్ గెలుచుకుని విశ్వ విజేతగా నిలచిన భారత జట్టుకు అభినందనలు తెలిపారు ఏపీ డిప్యూటీ సీఎం ప‌వ‌న్ కళ్యాణ్. 140 కోట్ల భారతీయుల ఆకాంక్షలను నిలబెడుతూ రోహిత్ సేన సాధించిన విజయం చరిత్రలో నిలిచి పోతుంద‌న్నారు.

దక్షిణాఫ్రికాతో జరిగిన తుది పోరులో జట్టు మొత్తం సమష్టిగా రాణించిన తీరు ప్ర‌శంస‌నీయ‌మ‌ని కొనియాడారు ప‌వ‌న్ క‌ళ్యాణ్. ఆద్యంతం ఉత్కంఠ భరితంగా సాగిన మ్యాచ్ లో ఒత్తిడిని జయంచి సగర్వంగా ప్రపంచకప్ సాధించి పెట్టిన భారత క్రికెటర్లకు పేరు పేరునా హృదయ పూర్వక శుభాకాంక్షలు తెలియ చేస్తున్న‌ట్లు పేర్కొన్నారు.

మీ విజయం భవిష్యత్ తరాలకు స్ఫూర్తి దాయకంగా నిలుస్తుంద‌ని తెలిపారు. ఇదే స్ఫూర్తిని కొనసాగిస్తూ క్రికెట్ లో భారత్ మరిన్ని విజయాలు అందుకోవాలని ఆకాంక్షించారు జ‌న‌సేన పార్టీ చీఫ్ , డిప్యూటీ సీఎం ప‌వ‌న్ క‌ళ్యాణ్‌.