తెలుగు రాష్ట్రాలు సుభిక్షంగా ఉండాలి – ప‌వ‌న్
ప్రజలంతా సుఖ సంతోషాల‌తో బాగుండాలి
అమ‌రావ‌తి – విజ‌య ద‌శ‌మి పండుగ సంద‌ర్బంగా తెలుగు వారంద‌రికీ శుభాకాంక్ష‌లు తెలిపారు ఏపీ డిప్యూటీ సీఎం ప‌వ‌న్ కళ్యాణ్ కొణిదెల. శక్తి స్వరూపిణి, సర్వ శుభకారిణి దుర్గా మాత ఆశీస్సులతో మీరు తలపెట్టే ప్రతీ కార్యం విజయవంతం అవ్వాలని ,తెలుగు రాష్ట్రాలు సుభిక్షంగా ఉండాలని ప్రార్థిస్తున్న‌ట్లు తెలిపారు ఏపీ డిప్యూటీ సీఎం.
ద‌స‌రాను పుర‌స్క‌రించుకుని దేశ, విదేశాల్లోని తెలుగు ప్రజలంతా బాగుండాల‌ని కోరారు. ప్రజలంతా సుఖ శాంతులతో వర్థిల్లేలా చూడాలని అమ్మ వారిని వేడుకుంటున్నానని పేర్కొన్నారు. చెడు పై మంచి సాధించిన విజయానికి ప్రతీకగా నిర్వహించుకునే దసరా పండుగ మన జీవితాల్లో కొత్త వెలుగు నింపాలని ఆకాంక్షిస్తున్నాని తెలిపారు ప‌వ‌న్ కళ్యాణ్ కొణిదెల.
దుష్ట సంహారం తర్వాత శాంతి, సౌభ్రాతృత్వంతో అందరూ కలిసి మెలిసి జీవించాలన్నదే దసరా పండుగ సందేశమ‌న్నారు. ఇదే స్ఫూర్తితో శాంతియుత, అభివృద్ధి కారక సమాజం కోసం కృషి చేద్దామ‌ని పిలుపునిచ్చారు ఏపీ డిప్యూటీ సీఎం.
శక్తి ఆరాధనకు ప్రాధాన్యతనిచ్చే ఈ పండుగ దినాల్లో అమ్మ వారి దివ్య మంగళ రూపాన్ని తొమ్మిది అవతారాల్లో దర్శించు కున్నామ‌ని తెలిపారు. మ‌రో వైపు క‌లియుగ దైవ‌మైన శ్రీ వేంక‌టేశ్వ‌ర స్వామి సాల‌క‌ట్ల బ్ర‌హ్మోత్స‌వాలు అంగ‌రంగ వైభ‌వంగా జ‌రుగుతున్నాయ‌ని పేర్కొన్నారు.
ఆంధ్ర‌ప్ర‌దేశ్ , తెలంగాణ రాష్ట్ర ప్ర‌జ‌లంద‌రికీ పేరు పేరున విజ‌య ద‌శ‌మి దసరా శుభాకాంక్ష‌లు తెలిపారు ప‌వ‌న్ కళ్యాణ్.
