అంధ గాయ‌కుడికి ఛాన్స్ ఇస్తా – థ‌మ‌న్
టీజీఎస్ఆర్టీసీ ఎండీకి అభినంద‌న
హైద‌రాబాద్ – ఆర్టీసీ బ‌స్సులో ప్ర‌యాణం చేస్తూ ఎలాంటి వాయిద్య ప‌రిక‌రాలు లేకుండానే కేవ‌లం చేతులు, కాళ్ల సాయంతో అద్భుతంగా పాట పాడి వైర‌ల్ గా మారిన అంధ గాయ‌కుడు రాజుకు అంత‌టా ప్ర‌శంస‌లు కురుస్తున్నాయి.
ఇప్ప‌టికే అత‌డిని ప్ర‌త్యేకంగా అభినంద‌న‌ల‌తో ముంచెత్తారు తెలంగాణ రాష్ట్ర రోడ్డు ర‌వాణా సంస్థ వైస్ చైర్మ‌న్, మేనేజింగ్ డైరెక్ట‌ర్ వీసీ స‌జ్జ‌నార్.
ఈ సంద‌ర్బంగా గాయ‌కుడు రాజుతో పాటు ఆయ‌న త‌ల్లిని ప్ర‌త్యేకంగా అభినందించారు. అంతే కాకుండా శాలువాతో స‌త్క‌రించారు. కొంత మేర సాయం చేశారు. దృఢమైన సంకల్పం, సాధించాలనే పట్టుదల ఉంటే వైకల్యం ఏ మాత్రం అడ్డుకాదని రాజు నిరూపిస్తున్నాడ‌ని కితాబు ఇచ్చారు ఎండీ వీసీ స‌జ్జ‌నార్.
మధురమైన గాత్రమే కాదు.. పాట‌కు అనుగుణంగా ఎలాంటి వాయిద్యాలు లేకుండానే త‌న చేతులు, కాళ్ల‌తో సంగీతాన్ని అందిస్తోన్న అత‌డి ప్రతిభ అద్భుతం అంటూ ప్ర‌శంసించారు. ఇదిలా ఉండ‌గా అత‌డికి పాడే అవ‌కాశం ఇవ్వాల‌ని ఎక్స్ వేదిక‌గా కోరారు స‌జ్జ‌నార్.
దీంతో ఎండీ విన‌తికి స్పందించారు ప్ర‌ముఖ సంగీత ద‌ర్శ‌కుడు ఎస్ థ‌మ‌న్. ఈ మేర‌కు తాను న్యాయ నిర్ణేత‌గా ఉన్న అల్లు అర‌వింద్ కు చెందిన ఆహా కార్య‌క్ర‌మంలో అంధ గాయ‌కుడు రాజుకు పాడేందుకు ఛాన్స్ ఇస్తాన‌ని ప్ర‌క‌టించారు.
ఈ సంద‌ర్బంగా థ‌మ‌న్ కు అభినంద‌న‌లు తెలిపారు ఆర్టీసీ ఎండీ వీసీ స‌జ్జ‌నార్.
