ఆన్ లైన్ లో టీటీడీ డైరీలు..క్యాలెండర్లు
ప్ర‌క‌టించిన టీటీడీ ఈవో జె. శ్యామ‌ల రావు
తిరుమల – శ్రీవారి భక్తులకు తీపి క‌బురు చెప్పింది టీటీడీ. ఇక నుంచి టీటీడీ క్యాలెండర్లు, డైరీల కోసం తిరుమ‌ల‌కు వెళ్లాల్సిన ప‌ని లేదు. ఇక ఎంచ‌క్కా ఆన్ లైన్ లోనే డైరీలు, క్యాలెండర్లు పొందే అవ‌కాశం క‌ల్పించింది. ఈ విష‌యాన్ని వెల్ల‌డించారు ఈవో జె. శ్యామ‌ల రావు.
భక్తుల సౌకర్యార్థం టీటీడీ 2025 సంవత్సర క్యాలెండర్లు, డైరీలను ఆప్ లైన్ లో ఎంపిక చేసిన ప్రాంతాలలోనూ, టిటిడి వెబ్ సైట్ ద్వారా ఆన్ లైన్ లో భక్తులకు విక్రయిస్తోంది.
2025 సంవత్సరానికి సంబంధించి 12- పేజీలు, 6- పేజీలు, టేబుల్-టాప్-క్యాలెండర్లు, డీలెక్స్ డైరీలు, చిన్న డైరీలను, శ్రీవేంకటేశ్వర స్వామి, శ్రీపద్మావతి అమ్మ వారి పెద్దసైజు, శ్రీవారి, శ్రీపద్మావతి అమ్మ వారు ఇరువురు ఉన్న కేలండర్లను టిటిడి అందుబాటులో ఉంచింది.
ముఖ్యంగా టిటిడి ఎంపిక చేసిన ప్రాంతాలైన తిరుమల, తిరుపతి, తిరుచానూరులో ఉన్న టిటిడి పబ్లికేషన్ స్టాల్స్‌తో పాటు హైదరాబాద్, చెన్నై, బెంగళూరు, విజయవాడ, విశాఖపట్నం, న్యూఢిల్లీ, ముంబై, వేలూరు, ఇతర ప్రధాన కళ్యాణ మండపాల్లో 2025 సంవత్సరం క్యాలెండర్లు, డైరీలను భక్తులకు అందుబాటులో ఉంచింది.
టిటిడి వెబ్ సైట్ ద్వారా ఆన్ లైన్ లో బుకింగ్ చేసుకున్న వారికి పోస్టల్ డిపార్ట్మెంట్ ద్వారా వారి ఇంటి వద్దే టిటిడి డైరీలు, క్యాలండర్లను పొందే సౌలభ్యం గతంలో లాగానే ఉంది.
టిటిడి క్యాలెండర్ లు, డైరీలను టిటిడి వెబ్ సైట్ ద్వారా (www.tirumala.org, ttdevasthanams.ap.gov.in) ఆన్ లైన్ లో నిర్ణయించిన ధరల మేరకు కొనుగోలు చేసేందుకు కల్పించిన సౌకర్యాన్ని భక్తులు వినియోగించు కోవాలని విజ్ఞప్తి చేశారు ఈవో జె. శ్యామ‌ల రావు.
