ఆగ‌స్టు 19న శ్రీవారి ఆన్ లైన్ టికెట్ల కోటా రిలీజ్
ప్ర‌క‌టించిన తిరుమల తిరుప‌తి దేవ‌స్థానం
తిరుమల – శ్రీవారి భ‌క్తుల‌కు టీటీడీ శుభ వార్త చెప్పింది. శ్రీవారి ఆర్జిత సేవా టికెట్లను ఆన్ లైన్ లో విడుదల చేయ‌నున్న‌ట్లు ప్ర‌క‌టించింది. ఆగ‌స్టు 19న వ‌చ్చే న‌వంబ‌ర్ నెల‌కు సంబంధించి టికెట్లను ఉదయం 10 గంటలకు రిలీజ్ చేస్తామ‌ని తెలిపింది టీటీడీ.
ఈ సేవా టికెట్ల ఎలక్ట్రానిక్ డిప్ కోసం ఆగష్టు 21వ తేదీ ఉదయం 10 గంటల వరకు ఆన్‌లైన్‌లో నమోదు చేసుకోవచ్చ‌ని పేర్కొంది. ఈ టికెట్లు పొందిన వారు ఆగష్టు 21 నుండి 23వ తేదీ మధ్యాహ్నం 12 గంటల లోపు సొమ్ము చెల్లించిన వారికి లక్కీడిప్‌లో టికెట్లు మంజూరవుతాయ‌ని స్ప‌ష్టం చేసింది టీటీడీ.
కల్యాణోత్సవం, ఊంజల్ సేవ, ఆర్జిత బ్రహ్మోత్సవం, సహస్ర దీపాలంకార సేవా టికెట్లను, అదేవిధంగా నవంబరు 9న శ్రీవారి ఆలయంలో నిర్వహించనున్న పుష్ప యాగం సేవ టికెట్లను ఆగష్టు 22వ తేదీ ఉదయం 10 గంటలకు ఆన్‌లైన్‌లో విడుదల చేస్తామ‌ని వెల్ల‌డించింది.
ఆగష్టు 22న వర్చువల్ సేవల కోటా ను మధ్యాహ్నం 3 గంటలకు విడుదల చేయ‌నున్న‌ట్లు తెలిపింది. అంగ ప్రదక్షిణం టోకెన్ల కోటాను ఆగ‌స్టు 23న ఉదయం 10 గంటలకు ఆన్ లైన్ లో రిలీజ్ చేస్తామ‌ని పేర్కొంది.
శ్రీవాణి ట్రస్టు టికెట్లకు సంబంధించిన నవంబరు నెల ఆన్ లైన్ కోటాను ఆగష్టు 23వ తేదీ ఉదయం 11 గంటలకు విడుదల చేస్తామ‌ని తెలిపింది.
వ‌యో వృద్ధులు, దివ్యాంగులు, దీర్ఘ‌కాలిక వ్యాధులున్న‌వారు తిరుమల శ్రీ‌వారిని ద‌ర్శించుకునేందుకు వీలుగా నవంబరు నెల ఉచిత ప్రత్యేక ద‌ర్శ‌నం టోకెన్ల కోటాను ఆగష్టు 23న మధ్యాహ్నం 3 గంటలకు టీటీడీ ఆన్‌లైన్‌లో విడుదల చేయ‌నుంది.
నవంబరు నెల‌కు సంబంధించిన ప్రత్యేక ప్రవేశ దర్శన టికెట్ల కోటాను ఆగష్టు 24న ఉదయం 10 గంటలకు రిలీజ్ చేయ‌నుంది టీటీడీ. ఇక తిరుమల, తిరుపతిల‌లో నవంబరు నెల గదుల కోటాను ఆగష్టు 24న మధ్యాహ్నం 3 గంటలకు ఆన్‌లైన్‌లో విడుదల చేస్తారు.
ఆగష్టు 27న తిరుమల – తిరుప‌తి శ్రీవారి సేవ కోటా ఉదయం 11 గంటలకు, న‌వ‌నీత సేవ మధ్యాహ్నం 12 గంటలకు, ప‌ర‌కామ‌ణి సేవ మధ్యాహ్నం 1 గంట‌కు ఆన్‌లైన్‌లో విడుదల చేయనున్నారు.
https://ttdevasthanams.ap.gov.in వెబ్‌సైట్ ద్వారా శ్రీవారి ఆర్జిత‌సేవ‌లు, దర్శన టికెట్లు బుక్ చేసుకోవాల‌ని భ‌క్తుల‌ను టీటీడీ కోరింది.
