కాంగ్రెస్ ప్ర‌భుత్వం కూల‌డం ఖాయం
వైసీపీ ఎంపీ విజ‌య సాయి రెడ్డి కామెంట్
అమ‌రావ‌తి – వైసీపీ ఎంపీ విజ‌య సాయి రెడ్డి సంచ‌ల‌న వ్యాఖ్య‌లు చేశారు. లోక్ స‌భ వేదిక‌గా నిప్పులు చెరిగారు. ఆయన తెలంగాణ స‌ర్కార్ ను టార్గెట్ చేశారు. త్వ‌ర‌లోనే ఆ రాష్ట్రంలో ప్రజలు ఎన్నుకున్న ప్ర‌భుత్వం కూలి పోవ‌డం ఖాయ‌మ‌ని అన్నారు. ఇందులో ఎలాంటి అనుమాన ప‌డాల్సిన అవ‌స‌రమే లేద‌ని స్ప‌ష్టం చేశారు. తాజాగా ఎంపీ చేసిన కామెంట్స్ క‌ల‌క‌లం రేపుతున్నాయి. ఒక బాధ్య‌త క‌లిగిన ఎంపీ చ‌ట్ట స‌భ‌ల్లో ఇలాంటి వ్యాఖ్య‌లు చేయ‌డం ఎంత వ‌ర‌కు స‌బ‌బు అనేది ఆలోచించు కోవాల‌ని ఎంపీలు పేర్కొంటున్నారు.
స్వార్ధ రాజకీయ ప్రయోజనాల సాధన కోసం పార్లమెంటరీ సంప్రదాయాలను సైతం తుంగలో తొక్కి హేతు బద్ధత లేకుండా అశాస్త్రీయంగా ఆంధ్రప్రదేశ్‌ విభజనకు పాల్పడిన కాంగ్రెస్ పార్టీని రాష్ట్ర ప్రజలు ఏనాటికీ క్షమించబోరని అన్నారు విజ‌య సాయి రెడ్డి.
రాష్ట్రపతి ప్రసంగానికి ధన్యవాదాలు తెలిపే తీర్మానంపై రాజ్యసభలో జరిగిన చర్చలో ఆయన మాట్లాడారు. ఆంధ్రప్రదేశ్‌కు ప్రత్యేక హోదా పొందలేక పోవడానికి కారణం ముమ్మాటికీ కాంగ్రెస్ పార్టీ చేసిన ఘోర తప్పిదమేన‌ని ధ్వ‌జ‌మెత్తారు.
ప్రత్యేక హోదా అంశాన్ని విభజన బిల్లులో పొందుపరచి పార్లమెంట్‌ ఆమోదం పొందినట్లయితే ఆంధ్రప్రదేశ్‌కు హోదా చట్టబద్దంగా లభించి ఉండేదన్నారు. ప్రత్యేక హోదా అంశాన్ని ప్రణాళికా సంఘానికి పంపించడం వల్ల‌నే హోదా అంశం చట్టబద్దతను కోల్పోయిందని శ్రీ విజయసాయి రెడ్డి కాంగ్రెస్‌పై దుమ్మెత్తి పోశారు.
