మ్యూజిక్ లెజెండ్ ఇళయరాజాకు అరుదైన గౌరవం
ఆస్ట్రేలియా : సంగీత దిగ్గజం ఇళయరాజా కు అరుదైన గౌరవం దక్కింది. ఆస్ట్రేలియాలో ప్రత్యేక స్టాంప్తో సత్కరించింది. సినిమా రంగంలో 50 ఏళ్ల అద్భుత ప్రస్థానాన్ని పురస్కరించుకుని ఆస్ట్రేలియాలోని విక్టోరియా పార్లమెంటులో దిగ్గజ సంగీత దర్శకుడు ఇళయరాజాను ఒక ప్రత్యేక స్మారక స్టాంప్తో సత్కరించారు. ఇది ఆయన అద్భుతమైన కెరీర్లో మరో మైలురాయిగా నిలిచింది. చెన్నైలోని జవహర్లాల్ నెహ్రూ స్టేడియంలో తమిళనాడు ప్రభుత్వం ఆయన 50 ఏళ్ల సినీ ప్రస్థానాన్ని పురస్కరించుకుని సన్మానించిన ఏడాది తర్వాత ఈ గౌరవం దక్కింది. ఇళయరాజా స్వయంగా సోషల్ మీడియా ద్వారా ఈ శుభవార్తను పంచుకుని తన అభిమానులను, నెటిజన్లను ఆనంద పరిచారు. ఒక ప్రత్యేక స్మారక స్టాంప్ విడుదలతో నా ప్రస్థానాన్ని గుర్తించి గౌరవించినందుకు విక్టోరియా ప్రభుత్వ ఆర్థిక శాఖ మంత్రి ఎన్వర్ ఎర్డోగన్ ఎంపీకి, పార్లమెంటు సభ్యులకు నా హృదయ పూర్వక కృతజ్ఞతలు తెలియ జేస్తున్నాను.
తమిళనాడులోని ఒక చిన్న, మారుమూల గ్రామంలో జన్మించి, ఆస్ట్రేలియా పార్లమెంటులో గౌరవం పొందడం నిజంగా హృదయానికి హత్తుకునే విషయం. నా సంగీతానికి ప్రాణం పోసిన ఎంతోమందికి, నాతో కలిసి నడిచిన కళాకారులకు , నా స్వరకల్పనలను ఆదరించిన తరాల తరబడి శ్రోతలకు కూడా ఈ సందర్భంగా కృతజ్ఞతలు తెలియ జేస్తున్నాను. విక్టోరియా ప్రభుత్వం పట్ల తన కృతజ్ఞతను తెలియ జేయడంతో పాటు ఆస్ట్రేలియా ప్రభుత్వం , పార్లమెంటు సభ్యులు తన 50 ఏళ్ల ప్రస్థానాన్ని పురస్కరించుకుని స్టాంప్ విడుదల ద్వారా తనకు అందించిన ఈ ప్రత్యేక గౌరవానికి సంబంధించిన వీడియోను కూడా ఆయన పంచుకున్నారు.