VijayaBhaskar
హైదరాబాద్ : మాజీ మంత్రి కేటీఆర్ నిప్పులు చెరిగారు. గురువారం ఆయన హైదరాబాద్ లో మాట్లాడారు. తమ గురించి , ప్రత్యేకించి అక్రమ ఆస్తులు కలిగి ఉన్నామంటూ శాసన సభ సాక్షిగా సీఎం ఎ. రేవంత్ రెడ్డి ప్రస్తావించడాన్ని తీవ్రంగా తప్పు పట్టారు. ఇది మంచి పద్దతి కాదన్నారు. గత కొన్ని ఏళ్ల నుంచి తప్పుడు కూతలు కూస్తూ సభ్య సమాజం తల దించుకునేలా రేవంత్ రెడ్డి మాట్లాడుతున్నాడని ధ్వజమెత్తారు. తెలంగాణ రాష్ట్రాన్ని తీసుకు వచ్చిన మహా నాయకుడు , మాజీ సీఎం కేసీఆర్ గురించి తూలనాడడం దారుణమన్నారు. ఇకనైనా తాను మారాలని లేక పోతే జనం బుద్ది చెప్పక తప్పదన్నారు. కూకట్పల్లిలో కొండయ్య రావు అనే పెద్ద మనిషి ఉంటే, రేవంత్ రెడ్డి అతని ఆస్తులను కూడా మా ఖాతాలోనే జమ చేస్తారా? అని ప్రశ్నించారు కేటీఆర్.
మాకు ఆయనతో ఎలాంటి సంబంధం లేదని స్పష్టం చేశారు. కేవలం వెలమ కులం అనే విషయం తప్ప, ఇంకేమీ లేదన్నారు మాజీ మంత్రి. కేసీఆర్ సోదరీమణులు, బావమరుదుల పిల్లలు సుమారు 300 మంది ఉంటారని, వారి ఆస్తులను కూడా మా ఖాతాలోనే జమ చేయడం విడ్డూరంగా ఉందన్నారు. సీఎంకు ఇది తగదన్నారు. ఇక నవీన్ రావుతో గానీ, కొండయ్య రావుతో గానీ మాకు ఉన్న సంబంధం ఏమిటి? అసలు మీకు ఏమైనా బుద్ధి ఉందా? అని ఆగ్రహం వ్యక్తం చేశారు. ఒకవేళ మాకు సంతోష్ రావుతో సంబంధం ఉండి ఉంటే, ఆయన ఆస్తులను కూడా మీరు కేసీఆర్ ఖాతాలో జమ చేస్తారా? అని ప్రశ్నించారు. మీ బావ మరుదుల పిల్లల ఆస్తులను మీ ఖాతాలో జమ చేస్తే మీకు ఎలా అనిపిస్తుంది? అని సవాల్ విసిరారు.
