హైద‌రాబాద్ : వరద రహిత నగరాన్ని తీర్చిదిద్దే లక్ష్యంతో, పూడిక పేరుకుపోయిన చెరువులను పునరుద్ధరించేందుకు గాను హైడ్రాకు బాధ్యతలు అప్పగించిన రాష్ట్ర ప్రభుత్వానికి వివిధ రంగాల నిపుణులు తమ మద్దతును ప్రకటించారు. హైడ్రా కార్యకలాపాలను రాష్ట్ర వ్యాప్తంగా విస్తరించాలని, అలాగే చెరువులు , వరద నీటి కాలువలను పరిరక్షించేందుకు తగిన చర్యలు తీసుకోవాలని వారు కోరారు. నగరం, శివారు ప్రాంతాలకు చెందిన పలువురు నిపుణులు కమిషనర్ AV రంగనాథ్‌ను కలిసి, సంస్థ చేపట్టిన కార్యక్రమాలకు తమ మద్దతును తెలిపారు. న్యాయవాదులు, పర్యావరణవేత్తలు, లయన్స్ క్లబ్ ప్రతినిధులు, రియల్ ఎస్టేట్ రంగ నిపుణులు, కాలనీ సంక్షేమ సంఘాల ప్రతినిధులు వంటి వివిధ వృత్తులకు చెందిన వ్యక్తులు కమిషనర్‌ను కలిసిన వారిలో ఉన్నారు. హైడ్రా ద్వారా చెరువులు పునరుద్ధరణకు నోచుకోవడం ఎంతో స్ఫూర్తిదాయకమని వారు పేర్కొన్నారు. నగరంలోని అన్ని చెరువులను ఇదే విధంగా సరైన నీటి ప్రవేశ, బహిష్కరణ మార్గాలతో (inlets and outlets) అభివృద్ధి చేస్తే, వరదలను చాలా వరకు అదుపు చేయవచ్చని వారు అభిప్రాయపడ్డారు.
చెరువుల చుట్టూ HYDRAA పెంపొందిస్తున్న పచ్చదనం భవిష్యత్ తరాలకు ఎంతో మేలు చేస్తుందని వారు గుర్తించారు. గతంలో ప్లాస్టిక్ వ్యర్థాలు , పూడిక కారణంగా మూడు మీటర్ల మందంతో ఏర్పడిన పొర వల్ల నీరు భూమిలోకి ఇంకేది కాదని, కానీ ఇప్పుడు పూడికను పూర్తిగా తొలగించి చెరువులను అభివృద్ధి చేయడం వల్ల చుట్టుపక్కల ప్రాంతాల్లో భూగర్భ జలమట్టాలు పెరుగుతున్నాయని వారు వివరించారు. ఇటీవల కురిసిన స్వల్ప వర్షాలకు కూడా చెరువులు నీటితో నిండి, స్వచ్ఛంగా కనిపిస్తున్నాయని వారు పేర్కొన్నారు. జలవనరులను పరిరక్షించడం ప్రకృతి సంరక్షణకు మార్గం సుగమం చేస్తుందని, ఈ దిశగా HYDRAA చేస్తున్న కృషి అభినందనీయమని వారు అన్నారు. పార్కులు , ప్రజలకు ఉపయోగపడే స్థలాలను ఆక్రమణల బారి నుంచి కాపాడటం చిన్న విషయం కాదని పేర్కొన్నారు. నగరవాసులలో హైడ్రా పట్ల ఎంతో నమ్మకం ఏర్పడిందని, ఆహ్లాదకరమైన వాతావరణాన్ని కల్పించేందుకు ఇదే స్థాయి పనితీరు కొనసాగుతుందని ఆశిస్తున్నట్లు వారు తెలిపారు.
