దీపావళికి ఎక్కువ బాణసంచా కొనుగోలు చేయాలి

చెన్నై : దీపావళికి ఎక్కువ బాణసంచా కొనుగోలు చేయాలని కోరారు బీజేపీ మాజీ చీఫ్ అన్నామ‌లై . ఎనిమిది లక్షల మంది కార్మికుల జీవనోపాధిని ప్రస్తావించారు ఈ సంద‌ర్బంగా. ఉత్తర భారతదేశంలోని ఢిల్లీ, ముంబై, గురుగ్రామ్, నోయిడా, ఘజియాబాద్ వంటి ప్రధాన నగరాలు తీవ్రమైన కాలుష్యంతో సతమతమవుతున్న తరుణంలో బాణసంచా వినియోగంపై అన్నామలై ఈ సందేశాన్ని ఇచ్చారు. తమిళనాడు ప్రజలకు ఒక విజ్ఞప్తి చేశారు. దీపావళి పండుగ సందర్భంగా పెద్ద ఎత్తున బాణసంచా కొనుగోలు చేసి, కాల్చాలని ఆయన కోరారు. రాష్ట్రంలోని బాణసంచా పరిశ్రమపైనే వేలాది కుటుంబాల మనుగడ ఆధారపడి ఉందని ఆయన పేర్కొన్నారు. పండుగకు ముందు విడుదల చేసిన ఒక వీడియో సందేశంలో, స్థానికంగా తయారైన బాణసంచాను, ముఖ్యంగా దేశంలోనే అతిపెద్ద బాణసంచా తయారీ కేంద్రమైన విరుదునగర్ జిల్లాలోని శివకాశిలో తయారైన ఉత్పత్తులను కొనుగోలు చేయాలని ఆయన ప్రజలను కోరారు.

ఈ పరిశ్రమ దాదాపు మూడు లక్షల మందికి ప్రత్యక్ష ఉపాధిని, మరో ఐదు లక్షల మందికి పరోక్ష ఉపాధిని కల్పిస్తోందని, అంటే మొత్తం ఎనిమిది లక్షల మందికి ఇది జీవనాధారంగా ఉందని ఆయన వివరించారు. మనం బాణసంచా కొనుగోలు చేసినప్పుడు, ఒక కుటుంబానికి కడుపు నింపేలా సహాయం చేస్తున్నాం అని ఆయన పేర్కొంటూ, దీపావళి అమ్మకాల వల్ల కలిగే ఆర్థిక ప్రాముఖ్యతను నొక్కి చెప్పారు. వాయు కాలుష్యంపై ఉన్న ఆందోళనల గురించి ప్రస్తావిస్తూ, పర్యావరణ పరిరక్షణ ముఖ్యమేనని అంగీకరించినప్పటికీ, కేవలం బాణసంచా వల్లే కాలుష్యం పెరుగుతుందనే వాదనతో ఆయన విభేదించారు. దేశంలో ఇతర కాలుష్య కారకాలు ఉన్నప్పుడు, బాణసంచా పరిశ్రమపైనే అన్యాయంగా కఠినమైన ఆంక్షలు విధించ కూడదని ఆయన అభిప్రాయ పడ్డారు. చివరగా, కుటుంబాలు తమ పిల్లలతో కలిసి స్థానిక దుకాణాలకు వెళ్లి, ఇక్కడే తయారైన బాణసంచాను కొనుగోలు చేయాలని అన్నామలై కోరారు. కార్మికుల జీవనోపాధిని కాపాడటానికి , తమిళనాడుకు చెందిన ఈ సాంప్రదాయ బాణసంచా పరిశ్రమ మనుగడ సాగించడానికి, దీపావళి సమయంలో ప్రజల మద్దతు ఎంతో అవసరమని ఆయన పేర్కొన్నారు.