అమెరికా : క్యాట్ వూ ఓపెన్ ఏఐలో చేరారు. త‌ను కోర్ ప్రొడక్ట్ మేనేజ్‌మెంట్‌కు నాయకత్వం వహించనున్నారు. గతంలో ‘ఆంత్రోపిక్’ సంస్థలో ఉన్నత పదవిలో పనిచేసిన క్యాట్ వూ ఇప్పుడు OpenAIలో కోర్ ప్రొడక్ట్ డెవలప్‌మెంట్ విభాగానికి నాయకత్వం వహించనున్నారు. వినియోగదారుల నియంత్రణలో ఉంటూనే, వారి పనులను సులభతరం చేసే ‘AI ఏజెంట్లను’ రూపొందించడంపై ఆమె ప్రధానంగా దృష్టి సారించనున్నారు. నవంబర్ 3న తాను పని చేస్తున్న మరో AI సంస్థ ‘ఆంత్రోపిక్’ నుండి వైదొలుగుతున్నట్లు ప్రకటించిన రెండు రోజులకే ఆమె OpenAIలో చేరడం గమనార్హం. వేగంగా అభివృద్ధి చెందుతున్న ఆర్టిఫిషియల్ ఇంటెలిజెన్స్ రంగంలో ప్రతిభావంతుల మార్పులకు ఇది మరో ఉదాహరణ. ‘X’ (ట్విట్టర్) వేదికగా తన కొత్త బాధ్యతల గురించి వెల్లడించిన క్యాట్ వూ OpenAIలో చేరడం పట్ల ఉత్సాహాన్ని వ్యక్తం చేశారు. ఆర్టిఫిషియల్ ఇంటెలిజెన్స్‌ను మరింత మందికి అందుబాటులోకి తీసుకు రావడంలో OpenAI సాధించిన విజయాలను ఆమె కొనియాడారు.
ముఖ్యంగా కోట్లాది మంది ప్రజలకు AI సాంకేతికతను చేరువ చేస్తూనే, ఉత్పత్తి అభివృద్ధిని (product development) తమ లక్ష్యానికి కేంద్ర బిందువుగా ఉంచుకోవడం అద్భుతమని ఆమె పేర్కొన్నారు. తన పోస్ట్‌లో ఆమె ఇలా రాశారు. అద్భుతమైన ప్రొడక్ట్ మేనేజ్‌మెంట్ టీమ్ , OpenAIలోని ప్రతి ఒక్కరితో కలిసి పని చేయడానికి నేను ఎంతో ఆసక్తిగా ఉన్నాను. మనమందరం కలిసి, మీకు, మీ బృందానికి తోడ్పడేలా, అదే సమయంలో మీ నియంత్రణలో ఉండే AI ఏజెంట్లను రూపొందిస్తాం. దీనివల్ల మీకు నచ్చిన వ్యక్తులతో గడపడానికి, మీకు ఇష్టమైన పనులు చేయడానికి మరిన్ని అవకాశాలు లభిస్తాయి. నేర్చుకోవడానికి, నిర్మించడానికి ఇంకా చాలా ఉన్నాయి. మీ అభిప్రాయాలను తెలియజేస్తూ ఉండండి అని కోరారు. OpenAI ప్రెసిడెంట్ , సహ-వ్యవస్థాపకుడు గ్రెగ్ బ్రాక్‌మాన్ (Greg Brockman) ఆమెకు సాదర స్వాగతం పలికారు. ప్రస్తుతం OpenAIలో కోర్ ప్రొడక్ట్స్ విభాగానికి నాయకత్వం వహిస్తున్న థిబో సోటియో కూడా ఆమెకు స్వాగతం పలుకుతూ, కలిసి పనిచేసేందుకు ఆసక్తి వ్యక్తం చేశారు.
