VijayaBhaskar
స్పష్టం చేసిన మాజీ ఉప రాష్ట్రపతి వెంకయ్య
అమరావతి : మాజీ ఉప రాష్ట్రపతి ముప్పవరపు వెంకయ్య నాయుడు సంచలన వ్యాఖ్యలు చేశారు. ఉచిత పథకాల వల్ల ఒరిగేది ఏమీ ఉండదన్నారు. సమాజంలో మరింత అంతరాలు పెరిగే అవకాశం ఉందన్నారు. ప్రతిదీ ఉచితంగా అలవాటు చేస్తూ పోతే చివరకు పని చేసే వారంటూ ఎవరూ ఉండరని అభిప్రాయ పడ్డారు. అది రాష్ట్రానికి, దేశానికి, ముఖ్యంగా సమాజానికి మంచిది కాదని పేర్కొన్నారు మాజీ ఉప రాష్ట్రపతి. ఏ ప్రభుత్వమైనా సరే ఏవీ ఎవరికీ ఉచితంగా ఇవ్వకూడదని స్పష్టం చేశారు. విద్య, వైద్య రంగాలు ప్రధానంగా ప్రజలకు అందుబాటులో ఉండాలని అన్నారు. మహిళలు ఉచితంగా తమకు బస్సు సౌకర్యం కల్పించాలని ఏపీ, తెలంగాణ రాష్ట్ర ప్రభుత్వాలను అడిగారా అని ప్రశ్నించారు.
విద్య వల్ల వికాసం అలవడుతుందన్నారు ముప్పవరపు వెంకయ్య నాయుడు. రోజు రోజుకు విద్య, వైద్య రంగాలు పూర్తిగా ప్రైవేట్, కార్పొరేట్ శక్తుల చేతుల్లోకి వెళ్లి పోయాయని ఆవేదన వ్యక్తం చేశారు మాజీ ఉప రాష్ట్రపతి. విలువలే ప్రాతిపదికగా ప్రజా ప్రతినిధులు ప్రజలకు సేవలు అందించలని, వారికి ఎల్లవేళలా అందుబాటులో ఉండాలని స్పష్టం చేశారు. విద్యతోనే ఉపాధి లభించడంతో పాటు సమాజంలో అత్యున్నత గౌరవం లభించేలా చేస్తుందని , అందుకే ప్రతి ఒక్కరు చదువుపై దృష్టి పెట్టాలని అన్నారు ముప్పవరపు వెంకయ్య నాయుడు.
