అమ‌రావ‌తి : ఏపీ ఐటీ, విద్యా శాఖ మంత్రి నారా లోకేష్ కీల‌క వ్యాఖ్య‌లు చేశారు. ఆంధ్రప్రదేశ్ అభివృద్ధిలో తదుపరి అధ్యాయాన్ని నిర్మించడంలో త‌మ‌తో భాగస్వామ్యం కావడానికి పరిశ్రమల నాయకులకు పిలుపునిచ్చారు. 2025-26 ఆర్థిక సంవత్సరం మొదటి 9 నెలల్లో భారతదేశం ప్రతిపాదించిన పెట్టుబడులలో 25.3% ఆంధ్రప్రదేశ్ ఆకర్షించిందని చెప్పారు. కానీ ప్రకటనలు ఆరంభం మాత్రమేన‌ని పేర్కొన్నారు. ప్రాజెక్టులను వేగంగా క్షేత్రస్థాయిలో అమలు చేయడమే మా అసలైన లక్ష్యం అని స్ప‌ష్టం చేశారు నారా లోకేష్.
మా వాగ్దానం 3S సూత్రాలపై ఆధారపడి ఉందన్నారు. వేగం, స్థిరత్వం, సేవ అనేది ప్ర‌ధానమ‌ని పేర్కొన్నారు. ఆంధ్రప్రదేశ్ వ్యాప్తంగా తాము ఎలక్ట్రానిక్స్, హరిత ఇంధనం, ఫార్మా స్యూటికల్స్, ఉక్కు, డ్రోన్లు, ఆక్వాకల్చర్, అధునాతన తయారీ, మరిన్ని రంగాలలో 23 రంగాల క్లస్టర్లను అభివృద్ధి చేస్తున్నామ‌ని తెలిపారు. వ్యవస్థాపకత, మౌలిక సదుపాయాలు , పటిష్టమైన అమలు ఏమి సాధించగలవో గుజరాత్ భారతదేశానికి చూపించిందని చెప్పారు నారా లోకేష్. ఆంధ్రప్రదేశ్ విస్తరణ, వేగం , తూర్పు తీరానికి ఒక వ్యూహాత్మక ముఖద్వారాన్ని అందిస్తుందని అన్నారు. గుజరాత్, ఆంధ్రప్రదేశ్ కలిసి అసాధారణమైన దానిని సృష్టించేందుకు వీలు క‌లుగుతుంద‌న్నారు.
