జీఎస్టీ తనిఖీలో 80 రెస్టారెంట్లు గుర్తింపు

హైదరాబాద్: వస్తు, సేవల పన్ను (జీఎస్టీ) రిజిస్ట్రేషన్లు రద్దు చేయబడిన రెస్టారెంట్లు వినియోగదారుల నుంచి పన్ను వసూలు చేస్తూనే ఉన్నాయని, మరికొన్ని అర్హత లేకపోయినా ఇన్‌పుట్ ట్యాక్స్ క్రెడిట్ (ఐటీసీ) క్లెయిమ్ చేశాయని తెలంగాణ జీఎస్టీ శాఖ తన విచారణలో వెల్లడించింది. తెలంగాణ వ్యాప్తంగా జీఎస్టీ అవకతవకలకు పాల్పడినట్లు అనుమానిస్తున్న 100కు పైగా రెస్టారెంట్లు, భోజనశాలలను గుర్తించారు. వీటిలో అత్యధికం హైదరాబాద్‌లోనే ఉన్నాయి. మాదాపూర్-హైటెక్ సిటీ ప్రాంతంలోని ఒక ప్రముఖ రెస్టారెంట్ కూడా పరిశీలనలో ఉన్న సంస్థలలో ఉందని తెలిపారు.

జీఎస్టీ రిజిస్ట్రేషన్లు రద్దు చేయబడిన రెస్టారెంట్లు అలా చేయడానికి అధికారం లేక పోయినప్పటికీ వినియోగదారుల నుంచి జీఎస్టీ వసూలు చేస్తూనే ఉన్నాయని ఆరోపణలు ఉన్నాయి. పన్ను అవకతవకలపై జరిపిన దర్యాప్తులో తెలంగాణ జీఎస్టీ శాఖ ఇటువంటి అనేక సంస్థలను గుర్తించింది. వసూలు చేసిన మొత్తాలను అక్రమంగా నిలుపుకున్నారా లేదా, తదుపరి ఎలాంటి చర్యలు తీసుకోవాలి అనే విషయాలను పరిశీలిస్తున్నారు.

పన్ను రిటర్న్‌లను రిజిస్ట్రేషన్ వివరాలు, సరఫరాదారుల ఇన్‌వాయిస్‌లు, కొనుగోలు రికార్డులు, అమ్మకాల గణాంకాలు, డిజిటల్ చెల్లింపు లావాదేవీలతో సరిపోల్చి చూసేందుకు జీఎస్టీ శాఖ ఉపయోగించే ఆర్టిఫిషియల్ ఇంటెలిజెన్స్ ఆధారిత డేటా అనలిటిక్స్ ద్వారా అనుమానిత అవకతవకలు వెలుగులోకి వచ్చాయి. ఈ వ్యవస్థ వ్యత్యాసాలను గుర్తించడానికి , సంభావ్య పన్ను ఉల్లంఘనలను పసిగట్టడానికి అధికారులకు సహాయ పడుతుంది.