కోడంగ‌ల్ లో సీఎం రేవంత్ రెడ్డి 3 రోజుల టూర్

హైద‌రాబాద్ : తెలంగాణ ముఖ్యమంత్రి రేవంత్ రెడ్డి మూడు రోజుల పాటు కొడంగల్‌లో పర్యటించనున్నారు. ఈ పర్యటనలో భాగంగా ఆయన రూ. 9,053 కోట్ల విలువైన 13 అభివృద్ధి ప్రాజెక్టులకు శంకుస్థాపన చేయనున్నారు . రూ. 46.08 కోట్ల వ్యయంతో నిర్మించిన 10 ప్రభుత్వ భవనాలను ప్రారంభించనున్నారు. సీఎం 7, 8, 9 తేదీలలో కొడంగల్‌లో పర్యటిస్తారు. ఈ పర్యటనలో ఆయన అభివృద్ధి, వ్యవసాయం, పరిశ్రమలు, మహిళా సాధికారతకు సంబంధించిన పలు కార్యక్రమాల్లో పాల్గొంటారు. నవంబర్ 7న ముఖ్యమంత్రి హకీంపేటలో ‘మెగా రైతు మేళాను , ‘ఇండస్ట్రియల్ ఎక్స్‌పో’ను ప్రారంభిస్తారు. రైతు మేళాలో భాగంగా ఆయన ప్రగతిశీల రైతులు , వ్యవసాయ శాస్త్రవేత్తలతో ముఖాముఖి సమావేశమవుతారు. అలాగే పారిశ్రామికవేత్తలతో కూడా భేటీ కానున్నారు. మరుసటి రోజు, ఆయన స్వయం సహాయక సంఘాల (SHG) మహిళలతో సమావేశమై, లగ‌చర్ల పారిశ్రామిక కారిడార్‌లో రూ. 81 కోట్ల వ్యయంతో ఏర్పాటు చేయనున్న ‘ఈకో-పామ్ ఆయిల్’ ఫ్యాక్టరీకి శంకుస్థాపన చేస్తారు.

అదేవిధంగా, రూ. 5,060 కోట్ల అంచనా వ్యయంతో చేపట్టనున్న ‘కోత్వాల్‌గూడ–నాచారం రేడియల్ రోడ్-2’కు శంకుస్థాపన చేయడంతో పాటు, రూ. 2,100 కోట్ల విలువైన ‘మహబూబ్‌నగర్-నారాయణపేట-కొడంగల్ ఎత్తిపోతల పథకం’ (MNKLIS) రెండో దశను ప్రారంభిస్తారు. వీటితో పాటు రూ. 1,410 కోట్ల వ్యయంతో 223 బిటుమినస్ (తారు) రోడ్ల నిర్మాణ పనులకు కూడా ఆయన శ్రీకారం చుట్టనున్నారు. ఇతర ప్రణాళికా బద్ధమైన ప్రాజెక్టులలో కొడంగల్‌లో రూ. 123 కోట్ల వ్యయంతో నిర్మించనున్న వ్యవసాయ కళాశాల, రూ. 118.80 కోట్ల వ్యయంతో నిర్మించిన 10 ‘తెలంగాణ పబ్లిక్ స్కూళ్ల’ ప్రారంభోత్సవం ఉన్నాయి. వీటితో పాటు, కొడంగల్, కోస్గి , మద్దూరులలో ఆధునిక బస్సు స్టాండ్‌ల నిర్మాణానికి ముఖ్యమంత్రి రేవంత్ రెడ్డి శంకుస్థాపన చేయనున్నారు. ఈ కార్యక్రమంలో భాగంగా పోలీస్ స్టేషన్లు, ఆసుపత్రులు, కళాశాలలు , ప్రభుత్వ కార్యాలయాల వంటి వివిధ సౌకర్యాలను ఆయన ప్రారంభించనున్నారు. నవంబర్ 9న హకీంపేటలో రైతుల కోసం ఏర్పాటు చేసిన బహిరంగ సభలో ముఖ్యమంత్రి ప్రసంగిస్తారు.