బాలీవుడ్, టాలీవుడ్ లో పని చేయడం ఆనందంగా ఉంది
చెన్నై : ప్ర‌ముఖ నటి కీర్తి సురేష్ ఆస‌క్తిక‌ర వ్యాఖ్య‌లు చేసింది. బాలీవుడ్, దక్షిణాది చిత్ర పరిశ్రమలను పోల్చుతూ రెండు చోట్లా పని చేయడం ఆనందంగా ఉందని అన్నారు. బాలీవుడ్, దక్షిణాది చిత్ర పరిశ్రమల మధ్య ఉన్న తేడాల గురించి కీర్తి సురేష్ మాట్లాడారు. హిందీ చిత్ర నిర్మాణం ప్రీ-ప్రొడక్షన్‌పై ఎక్కువ దృష్టి పెడుతుందని, దక్షిణాది ప్రాజెక్టులు మరింత సహజ సిద్ధంగా ఉంటాయని ఆమె అభివర్ణించారు. తన ‘అక్కా’ సినిమా ప్రమోషన్ సందర్భంగా ఈ అభిప్రాయాలను పంచుకున్నారు. దక్షిణాది చిత్ర పరిశ్రమలో తన సత్తా చాటిన తర్వాత, కీర్తి సురేష్ కొన్ని శక్తివంతమైన నటనలతో బాలీవుడ్‌ను ఏలడానికి సిద్ధంగా ఉన్నారు.
తమ సినిమా ‘అక్కా’ ప్రమోషన్ సందర్భంగా సహనటి రాధికా ఆప్తేతో కలిసి సంభాషించారు. బాలీవుడ్ ప్రీ-ప్రొడక్షన్‌పై ఎక్కువగా నమ్మకం ఉంచుతుందని, అయితే దక్షిణాది ప్రాజెక్టులు మరింత ‘సహజ సిద్ధంగా’ ఉంటాయని కీర్తి తెలిపారు. ఇది పూర్తిగా భిన్నమైన ప్రక్రియ. స్క్రిప్ట్ రీడింగ్‌లు, ప్రిపరేషన్ పనులు, ఇక్కడ జరిగే ప్రతీదీ వేరు. ప్రీ-ప్రొడక్షన్‌లో నటీనటులకు శిక్షణ ఇవ్వడం, వారితో మాట్లాడటం, ఇతర నటీ నటులందరినీ కలవడం వంటి వాటి కోసం తాము చాలా సమయం వెచ్చిస్తామన్నారు. అదే సౌత్‌లో అయితే అంతా చాలా సహజంగా జరిగిపోతుంది. నాకు ఈ రెండు పద్ధతులూ ఇష్టమే అని ఆమె అన్నారు.
రెండు ఇండస్ట్రీలలోనూ పనిచేయడం తనకు ఆనందాన్నిస్తుందని ‘మహానటి’ నటి తెలిపారు.