టీటీడీ డిప్యూటీ ఈవోపై అక్ర‌మాస్తుల కేసు : ఏసీబీ

తిరుమ‌ల : టీటీడీ డిప్యూటీ EO లోక‌నాథంపై అక్రమాస్తుల కేసు నమోదు చేసింది ఏపీ ఏసీబీ. తిరుపతిలో నాలుగు చోట్ల ఏకకాలంలో జరిపిన సోదాల్లో సుమారు రూ. 5 కోట్ల విలువైన అక్రమాస్తులు బయట పడ్డాయి. దీంతో మెందు లోకనాథంపై ఆంధ్రప్రదేశ్ అవినీతి నిరోధక శాఖ అక్రమాస్తుల కేసు నమోదు చేసింది. లోకనాథం, అతని బంధువుల ఇళ్లతో సహా నాలుగు ప్రాంతాల్లో ఈ సోదాలు నిర్వహించినట్లు ఏసీబీ వెల్ల‌డించింది. తిరుపతిలోని PK లేఅవుట్‌లో ఒక ఇంటిని కొనుగోలు చేసి, దానిని తన భార్య పేరు మీద రిజిస్టర్ చేయించుకున్నట్లు లోకనాథం ఇంట్లో లభించిన పత్రాల ద్వారా తేలిందని ACB పేర్కొంది. అలాగే, తిరుపతి నగరంలోని గొల్లవానిగుంట నివాస ప్రాంతంలో ఒక భవనంతో పాటు రెండు నివాస స్థలాలను కొనుగోలు చేసి, వాటిని కూడా తన భార్య పేరు మీద రిజిస్టర్ చేయించు కున్నారని తెలిపింది. తిరుపతి జిల్లాలోని పాడిరేడు అరణ్యం గ్రామంలో కొనుగోలు చేసిన ఇంటి స్థలం, తిరుపతి అర్బన్‌లోని శ్రీనివాస నగర్ నివాస ప్రాంతంలో తన కుమారుడి పేరు మీద రిజిస్టర్ చేయించుకున్న మరో స్థలానికి సంబంధించిన పత్రాలను కూడా అధికారులు స్వాధీనం చేసుకున్నారు.

సోదాల సమయంలో లోకనాథం , అతని కుమారుడి పేర్ల మీద ఉన్న నాలుగు ఫిక్స్‌డ్ డిపాజిట్లను కూడా గుర్తించినట్లు ACB వెల్లడించింది. . లోకనాథం బావమరుదుల ఇళ్లలో జరిపిన తదుపరి సోదాల్లో, ఆ అధికారి భార్య, ఇతరుల పేర్లతో ఉన్న రూ. 31.9 లక్షల విలువైన ఉమ్మడి ఆస్తి పత్రం లభ్యమైంది. అలాగే 2 కిలోల బంగారం, రూ. 12.5 లక్షల నగదు , 6.5 కిలోల వెండిని కూడా ఏసీబీ (ACB) స్వాధీనం చేసుకున్నట్లు తెలిపింది. కాగా, 2018లో సవరించిన అవినీతి నిరోధక చట్టం-1988లోని సెక్షన్ 13(2) , సెక్షన్ 13(1)(b) కింద ఈ కేసు నమోదు చేసిన‌ట్లు పేర్కొంది. తిరుమల లడ్డూ కల్తీ ఆరోపణలపై దర్యాప్తు చేస్తున్న సమయంలో టీటీడీ ఉద్యోగుల అక్రమ ఆస్తులకు సంబంధించి సీబీఐ అందించిన సమాచారం ఆధారంగా ఈ చర్య తీసుకున్నట్లు ఏసీబీ పేర్కొంది.

లడ్డూ కల్తీ ఆరోపణల కేసులో సీబీఐ తన దర్యాప్తును పూర్తి చేసి ఛార్జ్ షీట్ దాఖలు చేసిందని ఆ ప్రకటన తెలిపింది. దీనికి కొనసాగింపుగా, అప్పటి టీటీడీ చైర్మన్ వైవీ సుబ్బారెడ్డి వ్యక్తిగత సహాయకుడు (PA) కె. చిన్న అప్పన్నపై ఏసీబీ విశాఖపట్నం కార్యాలయం ఏప్రిల్ 22న అక్రమ ఆస్తుల కేసును నమోదు చేసింది. లోకనాథం 1989 ఫిబ్రవరి 1న కారుణ్య నియామకం కింద జూనియర్ అసిస్టెంట్‌గా టీటీడీలో చేరారని ఏసీబీ తెలిపింది. ఆ తర్వాత ఆయన సీనియర్ అసిస్టెంట్, సూపరింటెండెంట్, అసిస్టెంట్ ఎగ్జిక్యూటివ్ ఆఫీసర్ , డిప్యూటీ ఎగ్జిక్యూటివ్ ఆఫీసర్‌గా పదోన్నతి పొందారని, ప్రస్తుతం తిరుమలలోని టీటీడీలో డిప్యూటీ ఈఓ (Dy EO)గా పనిచేస్తున్నారని పేర్కొంది.