ఉదయనిధి స్టాలిన్ కామెంట్స్ పై కాంగ్రెస్ కౌంట‌ర్
చెన్నై, తమిళనాడు DMK నాయకుడు ఉదయనిధి స్టాలిన్ చేసిన వ్యాఖ్యలపై కాంగ్రెస్ పార్టీ సీరియ‌స్ గా స్పందించింది. కాంగ్రెస్ నాయకుడు తిరునావుక్కరసర్ ఆదివారం మీడియాతో మాట్లాడారు. నిప్పులు చెరిగారు. కాంగ్రెస్ పార్టీ వ‌ల్ల‌నే దేశంలో బీజేపీ, దాని మిత్ర‌ప‌క్షాలు, మోదీ, అమిత్ షా గెలుస్తూ వ‌స్తున్నారంటూ సంచ‌ల‌న వ్యాఖ్య‌లు చేయ‌డాన్ని తీవ్రంగా త‌ప్పు ప‌ట్టారు. ఉదయనిధి చేసిన కామెంట్స్ స‌త్య దూర‌మ‌న్నారు. ఇప్ప‌టి వ‌ర‌కు వారు కూడా కాంగ్రెస్ కూటమిలో అంతర్భాగంగానే ఉన్నారని అన్నారు. కాబట్టి ప్రధాని మోదీ విజయంలో DMKకి కూడా బాధ్యత ఉందన్నారు. DMK మిత్రులకు నా సూచన ఏమిటంటే, ఇప్పుడు మనం వేర్వేరు కూటములలో ఉన్నాం కాబట్టి, ఎవరి దారిలో వారు ముందుకు సాగుదాం అని సూచించారు. కఠిన పదాలతో ఒకరినొకరు విమర్శించు కోవడం మానేసి, రాష్ట్ర ప్రజల సంక్షేమం కోసం కృషి చేద్దాం అని పిలుపునిచ్చారు.
కోయంబత్తూరులో 10 ఏళ్ల బాలికపై జరిగిన లైంగిక దాడి, హత్య ఘటనపై కూడా స్పందించారు కాంగ్రెస్ నేత. పోలీసులు దర్యాప్తు చేస్తున్నారు, నిందితుడిని ఇప్పటికే అరెస్టు చేశారు. వారికి కఠిన శిక్ష పడాలి… ఇటువంటి ఘటనలు పునరావృతం కాకుండా పోలీసులు తగిన జాగ్రత్తలు తీసుకోవాల్సిన అవసరం ఉందన్నారు. మహిళలు, పిల్లల సంక్షేమానికి అత్యంత ప్రాధాన్యత ఇవ్వాల్సిన అవసరం ఉన్నందున, అందుకు అనుగుణంగా పోలీసు వ్యవస్థను తీర్చిదిద్దాల‌న్నారు. ఈ విషయంలో ముఖ్యమంత్రి విజయ్ తన వంతు కృషి చేస్తారని నేను ఆశిస్తున్నాను. ప్రజలు కూడా ఆయన నుండి ఇదే ఆశిస్తున్నారని చెప్పారు.
