VijayaBhaskar
ముంబై : టాటా సన్స్ చైర్మన్గా ఎన్. చంద్రశేఖరన్ను తిరిగి నియమిస్తూ తీసుకున్న నిర్ణయం చెల్లుబాటును టాటా ట్రస్ట్స్ సవాలు చేసింది. కంపెనీ ‘ఆర్టికల్స్ ఆఫ్ అసోసియేషన్’ ప్రకారం ట్రస్ట్ నామినేట్ చేసిన డైరెక్టర్లలో మెజారిటీ మద్దతు తప్పనిసరి అని, చైర్మన్ ‘కాస్టింగ్ ఓట్’ (నిర్ణయాత్మక ఓటు) ఆ నిబంధనను అధిగమించ లేదని వాదించారు. టాటా సన్స్ డైరెక్టర్లు ఎగ్జిక్యూటివ్ చైర్మన్ ఎన్. చంద్రశేఖరన్కు మరో పదవీకాలాన్ని ఆమోదించిన తర్వాత, భారతదేశపు అతిపెద్ద వ్యాపార సమూహంలో బోర్డు గది పోరు తీవ్రమైంది. ఈ ఓటింగ్ ప్రక్రియ చట్ట విరుద్ధమని గ్రూప్ అతిపెద్ద వాటాదారు పేర్కొన్నారు. టాటా సన్స్ షేర్లలో దాదాపు మూడింట రెండు వంతుల వాటాను కలిగి ఉన్న స్వచ్ఛంద సేవా ట్రస్ట్ల నెట్వర్క్కు నాయకత్వం వహిస్తున్న నోయెల్ టాటా చంద్రశేఖరన్ పదవీకాలాన్ని ఐదేళ్లు పొడిగించడానికి వ్యతిరేకంగా ఏకైక ఓటు వేశారు.
టాటా సన్స్ బోర్డులో ఉన్న మరో టాటా ట్రస్ట్స్ నామినీ వేణు శ్రీనివాసన్ ఈ పొడిగింపునకు మద్దతు ఇచ్చారు. బోర్డు సమావేశంలో ఎటువంటి ప్రతిష్టంభన లేదని, ట్రస్ట్ నామినేట్ చేసిన ఇద్దరు డైరెక్టర్లలో ఒకరు వ్యతిరేకంగా ఓటు వేసిన తర్వాత తీర్మానం చట్టబద్ధంగా ఆమోదం పొందలేదని ట్రస్ట్స్ తెలిపాయి. టాటా సన్స్ బోర్డులో ఇద్దరు టాటా ట్రస్ట్స్ నామినీలు ఉన్నారు. ఆ ఇద్దరిలో మెజారిటీ అంటే ఇద్దరే అవుతారు, ఒకరు కాదు అని ట్రస్ట్స్ పేర్కొన్నాయి. సెప్టెంబర్ 17న అటువంటి డైరెక్టర్లలో ఒకరు తీర్మానానికి వ్యతిరేకంగా ఓటు వేశారు. తద్వారా ఏఓఏ ప్రకారం తప్పనిసరి అయిన టాటా ట్రస్ట్స్ నామినీ డైరెక్టర్ల సానుకూల మద్దతు లభించలేదు. ఆ నిబంధన నెరవేరలేదు, కాబట్టి తీర్మానం కూడా వీగిపోయింది. ఎగ్జిక్యూటివ్ చైర్మన్గా చంద్రశేఖరన్కు మరో ఐదేళ్ల పదవీకాలాన్ని కల్పించేందుకు టాటా సన్స్ బోర్డు 4-1 ఓట్ల తేడాతో అనుకూలంగా ఓటు వేయగా, టాటా ట్రస్ట్స్ చైర్మన్ నోయెల్ టాటా ఆ ప్రతిపాదనను వ్యతిరేకించారు.
మరోసారి పదవీకాలం కోరనని గతంలో చెప్పిన చంద్రశేఖరన్, బోర్డు తన నిర్ణయాన్ని పునః పరిశీలించాలని కోరడంతో కొనసాగడానికి అంగీకరించారు. టాటా సన్స్లో దాదాపు 66 శాతం వాటాను కలిగి ఉన్న ట్రస్ట్లు, బోర్డులో మొత్తం ఓట్ల సంఖ్యతో సంబంధం లేదని పేర్కొన్నాయి.
