తిరుపతి : సనాతన ధర్మ పరిరక్షణ, భక్తిభావ వ్యాప్తి లక్ష్యంగా టీటీడీ, హిందూ ధర్మ ప్రచార పరిషత్, ఎస్వీబీసీ సంయుక్తంగా అక్టోబరు 20న కుప్పంలో శ్రీ మహాలక్ష్మీ దీపపూజ నిర్వహించనున్నట్లు టీటీడీ జేఈవో డా. ఎ. శరత్ తెలిపారు . కుప్పంలోని విలాజాపురం రోడ్డు, చెరువు కట్ట సమీపంలోని దీపోత్సవ ప్రాంగణంలో నిర్వహించనున్న ఈ కార్యక్రమ ఏర్పాట్లపై టీటీడీ, మున్సిపల్, పోలీసు అధికారులతో ఆయన సమీక్షించారు. ఈ సందర్భంగా జేఈవో మాట్లాడుతూ, మహాలక్ష్మీ అమ్మవారి అనుగ్రహంతో భక్తులకు సౌభాగ్యం, శాంతి, మంగళం కలగాలనే సంకల్పంతో దీపపూజ నిర్వహిస్తున్నట్లు వెల్ల‌డించారు. దీపం పవిత్రతకు, జ్ఞానానికి, ఐక్యతకు ప్రతీక అని పేర్కొన్నారు.
దీపపూజకు వచ్చే భక్తుల కోసం షెడ్లు, మ్యాట్లు, దీపారాధన సామగ్రి, ఎల్‌ఈడీ స్క్రీన్లు, తాగునీరు తదితర సౌకర్యాలను సమకూర్చాలని అధికారులను ఆదేశించారు. భక్తులకు మజ్జిగ, అన్నప్రసాదం పంపిణీకి తగిన ఏర్పాట్లు చేయాలని, పోలీసు, మున్సిపల్, టీటీడీ విభాగాలు సమన్వయంతో పనిచేయాలని సూచించారు. ఈ సమీక్షలో టీటీడీ బోర్డు సభ్యులు శాంతారం, విజీఓ గిరిధర్, ఇంజినీరింగ్ అధికారులు, ఎస్వీబీసీ ప్రతినిధులు, పోలీసు, మున్సిపల్ అధికారులు పాల్గొన్నారు. ఇదిలా ఉండ‌గా తిరుమ‌లలో నిర్వ‌హించిన శ్రీ‌వారి గ‌రుడ సేవ విజ‌య‌వంతంగా ముగిసింద‌న్నారు. స‌హ‌క‌రించి స‌క్సెస్ చేసిన ప్ర‌తి ఒక్క‌రికీ ధ‌న్య‌వాదాలు తెలిపారు.
