హైదరాబాద్ : హైదరాబాద్‌ను పరిశుభ్రంగా, ట్రాఫిక్ రహితంగా మార్చాలని సీఎం రేవంత్ రెడ్డి అధికారుల‌ను ఆదేశించారు. న‌గ‌రంలో పారిశుధ్యాన్ని మెరుగు పరచడానికి, తాగునీటిని సంరక్షించడానికి, ట్రాఫిక్ రద్దీని తగ్గించడానికి సమగ్ర చర్యలు తీసుకోవాలని అన్నారు. ముఖ్యమంత్రి తన జూబ్లీ హిల్స్ నివాసంలో మున్సిపల్ అధికారులతో సమీక్షా సమావేశం నిర్వహించి, వివిధ పౌర సమస్యలపై చర్చించారు. నగర వ్యాప్తంగా సమర్థవంతమైన వ్యర్థాల నిర్వహణను నిర్ధారించాలని, రోజువారీ చెత్త సేకరణను నిరంతరం పర్యవేక్షించాలని, బహిరంగ ప్రదేశాలలో వ్యర్థాలు పేరుకు పోకుండా నివారణ చర్యలు తీసుకోవాలని ఆదేశించారు.
ఇంటింటికీ వెళ్లి చెత్త సేకరణ అమలు, నిర్లక్ష్యం వహించిన వారిపై తీసుకున్న చర్యల గురించి అధికారులు ముఖ్యమంత్రికి వివరించారు. నిర్మాణ వ్యర్థాలను తొలగించడానికి ప్రత్యేక ఏర్పాట్లు చేయాలని రేవంత్ రెడ్డి పిలుపునిచ్చారు. పారిశ్రామిక ప్రాంతాల్లో సరైన వ్యర్థాల సేకరణ జరిగేలా పరిశ్రమల విభాగంతో సమన్వయం చేసుకోవాలని సూచించారు. నిర్మాణ కార్యకలాపాలు, పార్కుల నిర్వహణ, ల్యాండ్‌స్కేపింగ్, గార్డెనింగ్ కోసం మురుగు నీటి శుద్ధి కర్మాగారాల (STP) నుండి శుద్ధి చేసిన మురుగునీటి వినియోగాన్ని ప్రోత్సహించాల్సిన అవసరాన్ని ముఖ్యమంత్రి నొక్కి చెప్పారు. తాగునీటిని ఇతర అవసరాలకు వాడకూడదని, అలాగే తాగునీటి సంరక్షణ ఆవశ్యకతను ఆయన నొక్కి చెప్పారు.
హైదరాబాద్ వాటర్ బోర్డ్ ఇప్పటికే మొదటి దశలో గ్రీన్ వాటర్ ట్యాంకర్ సేవను ప్రారంభించింది. 19 ఎస్టీపీల నుండి సేకరించిన 28 ట్యాంకర్లతో ఈ సేవను నడుపుతోంది. అవసరాలను బట్టి గ్రేటర్ హైదరాబాద్ మున్సిపల్ కార్పొరేషన్ (జీహెచ్‌ఎంసీ), సైబరాబాద్ మున్సిపల్ కార్పొరేషన్ (సీఎంసీ), మల్కాజిగిరి మున్సిపల్ కార్పొరేషన్ (ఎంఎంసీ) పరిధిలోని ప్రాంతాలకు శుద్ధి చేసిన నీటి సరఫరాను విస్తరించాలని ముఖ్యమంత్రి ఆదేశించారు. ట్రాఫిక్ నిర్వహణ చర్యలను సమీక్షిస్తూ హైదరాబాద్ వ్యాప్తంగా ట్రాఫిక్ నియంత్రణ, రద్దీ తగ్గింపుపై ప్రత్యేక దృష్టి పెట్టాలని రేవంత్ రెడ్డి పిలుపునిచ్చారు. సులభమైన ట్రాఫిక్ రాకపోకల కోసం కీలక ప్రదేశాలలో అండర్‌పాస్‌లు, ఎలివేటెడ్ కారిడార్ల నిర్మాణానికి సమగ్ర ప్రణాళికలు సిద్ధం చేయాలని ఆదేశించారు.
