హైద‌రాబాద్ : భారత రత్న ఎల్.కె. అద్వాణీ జీ శతవసంతంలోకి అడుగు పెడుతున్నారు. మొదటిది, ఆయనకున్న సైద్ధాంతిక స్పష్టత , మేధో పరమైన పదును. ఇది ఆయన ప్రసంగాల్లో, రచనల్లో స్పష్టంగా కనిపించేది. ఆయన రూపొందించిన జనసంఘ్, బీజేపీ తీర్మానాలు నేటికీ చదవదగ్గవిగా ఉన్నాయి; అలాగే ఆయన ఇచ్చిన ఇంటర్వ్యూలు ఎంతో లోతైనవిగా, సూటిగా ఉండేవి. రెండవది భారత రాజకీయాల్లోని ఒక పెద్ద వర్గం చాలా కాలంగా ప్రచారం చేసిన ‘మిథ్యా లౌకిక వాదాన్ని’ ఆయన ఎండగట్టిన తీరు ప్ర‌త్యేక‌మైన నాయకుడిగా నిల‌బెట్టింది. శ్రీ లాల్ కృష్ణ అద్వాణీ జీ నేడు నవంబర్ 8న తన జీవితంలో వందవ సంవత్సరంలోకి ప్రవేశిస్తున్నారు. ఈ ఏడాది ఆయన పుట్టినరోజు దీపావళి పండుగతో కలిసి రావడం విశేషం. ఇది ప్రభు శ్రీరాముడితో, దీపంతో ముడిపడి ఉన్న పండుగ. సరిగ్గా ఇదే సమయంలో మనం జనసంఘ్ ఆవిర్భావం తర్వాత 75 ఏళ్లు, డాక్టర్ శ్యామా ప్రసాద్ ముఖర్జీ 125వ జయంతి, ఇటీవల జరుపుకున్న ఆర్.ఎస్.ఎస్ శతవసంత వేడుకలను గుర్తు
చేసుకుంటున్నాం. ఆధునిక భారతదేశ చరిత్రలోని అనేక కీలక ఘట్టాలతో ముడిపడిన జీవితం ఆయనది. అద్వాణీ జీ 1927 నవంబర్ 8న, ‘దేవ్ దీపావళి’ రోజున జన్మించారు. 1947లో, చిన్న వయసులోనే ఆయన సింధు ప్రాంతంలోని తన పరిచయ ప్రపంచాన్ని వదిలి రావాల్సిన బాధను అనుభవించారు. ఎటువంటి చేదు భావనలు లేకుండా, ఆయన తన జీవితాన్ని మొదటి నుండి తిరిగి నిర్మించుకున్నారు. కష్టతరమైన పరిస్థితుల్లో కూడా శూన్యం నుండి అన్నీ నిర్మించుకోగల ఈ లక్షణం ఆయనలో ఎప్పుడూ ఉంది. జనసంఘ్‌ను బలోపేతం చేసేటప్పుడు, ఆ తర్వాత బీజేపీని నిర్మించేటప్పుడు ఆయన ఈ సామర్థ్యాన్ని ప్రదర్శించారు. ఆయన బీజేపీ అధ్యక్షుడిగా ఉన్న కాలంలో, 1989లో కాంగ్రెస్ పార్టీ 400 స్థానాల నుండి 200 కంటే తక్కువ స్థానాలకు పడి పోయింది; అలాగే 1996లో బీజేపీ అతిపెద్ద పార్టీగా అవతరించింది. అద్వాణీ జీ అనేక తరాల కార్యకర్తలను తీర్చిదిద్దారు . ‘దేశమే ప్రథమం’ అనే సూత్రంపై పార్టీకి బలమైన పునాదిని అందించారు.
ఆర్‌ఎస్‌ఎస్ ప్రచారక్‌గా అద్వానీజీ మొదట రాజస్థాన్‌లోని వివిధ ప్రాంతాలలో పనిచేశారు. అక్కడి నుండి, ఆయన జాతీయ రాజధానికి వెళ్లి, అక్కడ అటల్ జీతో సన్నిహితంగా పని చేయడం ప్రారంభించారు. ఇద్దరు మహోన్నత రాజకీయ నాయకులు ఒకరికొకరు పోటీదారులుగా మారకుండా, సహకరించుకుంటూ అనేక దశాబ్దాల పాటు కలిసి పని చేయడం అరుదని చరిత్ర చెబుతుంది. అద్వానీజీ , అటల్ జీ ఒక అద్భుతమైన ఉదాహరణను నెలకొల్పారు. వారిద్దరూ కలిసి భారత రాజకీయాల గమనాన్ని మార్చారు. అద్వానీజీ వచ్చినప్పటి ఢిల్లీ, దేశ విభజన దుస్థితి నుండి కోలుకుంటోంది. ఆయన జనసంఘ్‌ను బలోపేతం చేయడంలో పూర్తిగా నిమగ్నమయ్యారు. 1967లో, అద్వానీజీ ఢిల్లీ మెట్రోపాలిటన్ కౌన్సిల్ ఛైర్మన్ అయ్యారు, అక్కడ ఆయన దివంగత విజయ్ కుమార్ మల్హోత్రా జీ తో కలిసి పనిచేశారు. 1970లో, అద్వానీజీ పార్లమెంటరీ ప్రస్థానం ప్రారంభమైంది. ఆయన జోక్యాలు రాజకీయ వర్గాలన్నిటిలోనూ ప్రశంసలు పొందాయి. ఆయన ఎంపీగా ఆ తర్వాత ఉభయ సభలలో ప్రతిపక్ష నాయకుడిగా, అధికార పక్షం నుండి కూడా తనదైన ముద్ర వేశారు
