VijayaBhaskar
హైదరాబాద్ : గిగ్ , ప్లాట్ఫామ్ కార్మికుల కోసం ఇండియన్ బ్యాంక్ ఇండీ-గిగ్ చాంపియన్ పొదుపు ఖాతాను గురువారం ప్రారంభించింది. తెలంగాణ గిగ్, ప్లాట్ఫామ్ వర్కర్స్ యూనియన్ (టిజిపిడబ్ల్యూ యు )తో పైలట్ కార్యక్రమం కింద దీనిని స్టార్ట్ చేసింది. ఇందులో భాగంగా యాప్ ఆధారిత ఆటో, క్యాబ్ డ్రైవర్లు, డెలివరీ కార్మికులు, ఫ్రీలాన్సర్లు , ఇతర డిజిటల్ వర్క్ఫోర్స్ భాగస్వాములతో సహా గిగ్ , ప్లాట్ఫామ్ కార్మికుల కోసం ప్రత్యేకంగా రూపొందించిన “ఇండీ-గిగ్ చాంపియన్” అనే ప్రత్యేక బ్యాంకింగ్ ఉత్పత్తిని ఇండియన్ బ్యాంక్ ప్రవేశపెట్టింది.
గిగ్ కార్మికుల ఆర్థిక చేరికకు మద్దతుగా ఎఫ్జీఎం రామచంద్ర బాబు, హైదరాబాద్ జోనల్ మేనేజర్ కె. శ్రీనివాస్, ఆర్ అండ్ జీఆర్ హెడ్ కె. శేఖర్ బాబు , తెలంగాణ గిగ్ , ప్లాట్ఫామ్ వర్కర్స్ యూనియన్ (టిజిపిడబ్ల్యూ యు) వ్యవస్థాపక అధ్యక్షుడు షేక్ సలావుద్దీన్ మార్గదర్శకత్వంలో ఇండియన్ బ్యాంక్ ఒక పైలట్ కార్యక్రమాన్ని ప్రారంభించింది. ఈ కార్యక్రమంలో భాగంగా హైదరాబాద్లోని అంబర్పేట్లో ఉన్న టీజీపీడబ్ల్యూయూ కార్యాలయంలో ఈరోజు మొదటి 100 పొదుపు ఖాతాలు తెరిచారు. మరిన్ని వేల మంది కార్మికులకు ఈ ప్రయోజనాలను విస్తరించడానికి త్వరలో ఒక పెద్ద ఎత్తున ఖాతా తెరిచే శిబిరం నిర్వహించనున్నట్లు ఈ సందర్బంగా వెల్లడించారు షేక్ సలావుద్దీన్.
ఈ పొదుపు ఖాతా వల్ల గిగ్, ప్లాట్ ఫామ్ కార్మికులకు ఎంతో మేలు చేకూరనుంది. ఈ ఇండీ-గిగ్ ఛాంపియన్ పొదుపు ఖాతా ద్వారా ఉచిత జీరో-బ్యాలెన్స్ తో పాటు అర్హులైన గిగ్ , ప్లాట్ఫామ్ కార్మికులకు రూ. 5,00,000 వరకు ఉచిత గ్రూప్ వ్యక్తిగత ప్రమాద బీమా కవరేజ్ అందుతుంది. సురక్షితమైన, సౌకర్యవంతమైన ,పూర్తి డిజిటల్ బ్యాంకింగ్ సేవలు అందుబాటులోకి వస్తాయని తెలిపారు సలావుద్దీన్. బ్యాంకు అధికారులు మాట్లాడుతూ గిగ్ , ప్లాట్ఫామ్ కార్మికుల జీవనోపాధికి మద్దతునిచ్చే, అందుబాటులో ఉండే, సురక్షితమైన , సమ్మిళిత బ్యాంకింగ్ సేవలను అందించడం ద్వారా వారి ఎదుగుదలలో ఆర్థిక భాగస్వామిగా నిలవడం మా బాధ్యత అని పేర్కొన్నారు.
గిగ్ , ప్లాట్ఫామ్ కార్మికుల ఆర్థిక భద్రత దిశగా ఇది ఒక ముఖ్యమైన ముందడుగు అని పేర్కొన్నారు షేక్ సలావుద్దీన్. ఉచిత జీరో-బ్యాలెన్స్ పొదుపు ఖాతాతో పాటు 5 లక్షల ప్రమాద బీమా కవరేజ్ ఎంతో అవసరమైన రక్షణను అందించి, మరింత ఆర్థిక సమ్మిళితాన్ని ప్రోత్సహిస్తుందన్నారు. గిగ్ కార్మికుల అవసరాలను గుర్తించి, ఈ ముఖ్యమైన చొరవలో టిజిపిడబ్ల్యూ యు తో భాగస్వామ్యం అయినందుకు ఇండియన్ బ్యాంక్కు తాము దన్యవాదాలు తెలియ చేస్తున్నట్లు పేర్కొన్నారు.
