పాకిస్తాన్ : జైలులో ఉన్న పాకిస్తాన్ మాజీ ప్ర‌ధానమంత్రి ఇమ్రాన్ ఖాన్ ఆరోగ్య ప‌రిస్థితి రోజు రోజుకు క్షీణిస్తోంది. ఆయ‌న‌ను వెంట‌నే విడుదల చేయాల‌ని కోరుతూ పీటీఐ పార్టీ సెప్టెంబర్ 27న దేశ వ్యాప్తంగా నిర‌స‌న‌లు, ఆందోళ‌న‌ల‌కు పిలుపునిచ్చింది. దీంతో ఇమ్రాన్ ఖాన్ సోద‌రీమ‌ణులైన అలీమా, ఉజ్మా , నొరీన్ ఖాన్‌లను అదుపులోకి తీసుకున్నారని పీటీఐ తెలిపింది. 30 రోజుల నిర్బంధ ఉత్తర్వుల కింద లాహోర్‌లోని కోట్ లఖ్‌పత్ జైలుకు పంపినట్లు తెలిపింది. పంజాబ్ పోలీసులు అలీమా ఖాన్ ఇంటిపై దాడి చేసి ఇమ్రాన్ ఖాన్ యొక్క ఇతర ఇద్దరు సోదరీమణులను అతని మేనల్లుళ్లను, వారి పిల్లలను అపహరించారు పాకిస్థాన్ తెహ్రీక్-ఎ-ఇన్సాఫ్ (పీటీఐ) పార్టీ ప్రతినిధి జుల్ఫీ బుఖారీ సోషల్ మీడియా ప్లాట్‌ఫామ్ Xలో తెలిపారు.
ఇమ్రాన్ ఖాన్ సోదరీమణులను, వారి పిల్లలను అదుపులోకి తీసుకున్నారు, కానీ పిల్లలను విడుదల చేశారు అని పీటీఐ సమాచార కార్యదర్శి షేక్ వకాస్ అక్రమ్ ఏఎఫ్‌పీకి తెలిపారు. ఈ అరెస్టులలో ఖాన్ సోదరీమణులు అలీమా ఖాన్, డాక్టర్ ఉజ్మా ఖాన్ , నోరీన్ ఖాన్ ఉన్నట్లు సమాచారం. పంజాబ్ ప్రావిన్స్ యొక్క ప్రజా శాంతి భద్రతల పరిరక్షణ చట్టం కింద ముగ్గురు సోదరీమణులను 30 రోజుల పాటు నిర్బంధంలో ఉంచాలని లాహోర్ డిప్యూటీ కమిషనర్ రెండు వేర్వేరు ఉత్తర్వులు జారీ చేశారు. ఈ ఉత్తర్వుల ప్రతులను ఏఎఫ్‌పీ పరిశీలించింది. ఈ విషయంపై వ్యాఖ్యానించాలని ఏఎఫ్‌పీ కోరగా, పంజాబ్ పోలీసులు స్పందించ లేదు. సెప్టెంబర్ 27న నిరసన ప్రదర్శనకు ఖాన్ పార్టీ పిలుపునిచ్చింది. ఈ నిరసన పిలుపు చట్టవిరుద్ధమని సమాచార శాఖ మంత్రి అత్తావుల్లా తారర్ అన్నారు.
