సోనియా గాంధీ కేసు మెజిస్ట్రేట్ కు అప్ప‌గించిన కోర్టు

న్యూఢిల్లీ : ఏఐసీసీ మాజీ చీఫ్ సోనియా గాంధీ ఓటర్ల జాబితా కేసును తిరిగి మేజిస్ట్రేట్‌కు అప్పగించంది ఢిల్లీ కోర్టు. మేజిస్ట్రేట్ గతంలో ఇచ్చిన ఉత్తర్వులో తగిన కారణాలు లేవని పేర్కొంటూ ఎఫ్‌ఐఆర్ నమోదు చేయాలని కోరుతూ దాఖలైన పిటిషన్‌పై కొత్తగా విచారణ జరపాలని కోర్టు ఆదేశించింది. 1983లో భారత పౌరసత్వం పొందడానికి మూడేళ్ల ముందే కాంగ్రెస్ నాయకురాలు సోనియా గాంధీ పేరు ఓటర్ల జాబితాలో చేర్చారన్న ఆరోపణపై దర్యాప్తు చేయడానికి నిరాకరిస్తూ మేజిస్ట్రేట్ ఇచ్చిన సెప్టెంబర్ 11, 2025 నాటి ఉత్తర్వును సవాలు చేస్తూ దాఖలైన రివిజన్ పిటిషన్‌ను ఢిల్లీ కోర్టు అనుమతించింది. ఆ ఉత్తర్వులో చట్టపరమైన స్పష్టత లోపించిందని, అది సరైన పరిశీలన లేకుండా జరిగిందని పేర్కొంటూ ప్రత్యేక న్యాయమూర్తి విశాల్ గోగ్నే దానిని రద్దు చేశారు.

రౌస్ అవెన్యూ కోర్టుల పరిధిలోని సెంట్రల్ ఢిల్లీ కోర్ట్ బార్ అసోసియేషన్ ఉపాధ్యక్షుడు, న్యాయవాది వికాస్ త్రిపాఠి దాఖలు చేసిన ఫిర్యాదును ఆ మేజిస్ట్రేట్ ఉత్తర్వు గతంలో కొట్టివేసింది. భారతీయ నాగరిక్ సురక్షా సంహిత లోని సెక్షన్ 175(3) నిబంధనలను పాటించక పోవడం వల్ల ఆ ఉత్తర్వులో “స్పష్టమైన చట్టపరమైన లోపం” ఉందని న్యాయమూర్తి పేర్కొన్నారు. ఇందులో సంబంధిత పోలీసు అధికారి వాదనలను వినక పోవడం, సంబంధిత పోలీస్ స్టేషన్ నుండి స్థితిగతుల నివేదికను పొందక పోవడం వంటి అంశాలు ఉన్నాయి. చట్టం ప్రకారం అందుబాటులో ఉన్న రెండు మార్గాలను అంటే ఎఫ్‌ఐఆర్ నమోదుకు ఆదేశించడం లేదా బీఎన్ఎస్ఎస్ కింద చర్యలు చేపట్టడం, పరిశీలించడంలో విఫలమవడం వల్ల మేజిస్ట్రేట్ ఉత్తర్వులో “తగిన కారణాలు లేకపోవడం” స్పష్టంగా కనిపిస్తోందని కోర్టు పేర్కొంది.