బెంగ‌ళూరు : క‌ర్ణాట‌క సీఎం డీకే శివకుమార్ షాకింగ్ కామెంట్స్ చేశారు. సోమ‌వారం ఆయన మీడియాతో మాట్లాడారు. భారత ప్రధాన న్యాయమూర్తిని కలవడం తప్ప మరో మార్గం క‌నిపించ‌డం లేద‌న్నారు. తన చెన్నై పర్యటన సందర్భంగా మీడియా అడిగిన ప్రశ్నకు సమాధానమిస్తూ భారత ప్రధాన న్యాయమూర్తి ప్రజల వాణిని వినాలని, అలాగే ప్రతిపక్ష నాయకుల విజ్ఞప్తులకు ఎన్నికల సంఘం స్పందించనప్పుడు వారి ఆందోళనలను అర్థం చేసుకోవడానికి ప్రధానమంత్రి వారిని పిలవాల్సిందని శివకుమార్ అన్నారు. ప్రజాస్వామ్యాన్ని, పౌరుల ఓటు హక్కులను పరిరక్షించడానికి భారత ప్రధాన న్యాయమూర్తిని కలవడం తప్ప మరో మార్గం లేదని అన్నారు. ఎన్నికల సంఘం స్పందించనప్పుడు, సాధ్యమయ్యే అన్ని మార్గాలను అన్వేషించాలని ఆయన నొక్కి చెప్పారు.
ఎన్నికల సంఘంతో సమావేశమైనప్పటికీ వారు స్పందించనప్పుడు, ప్రధానమంత్రి మమ్మల్ని పిలిచి సమస్య ఏమిటో అడగాల్సింది అని పేర్కొన్నారు సీఎం. ఇండియా బ్లాక్ నాయకులకు భారత ప్రధాన న్యాయమూర్తి అపాయింట్‌మెంట్ నిరాకరించడం గురించి అడగ్గా ప్రజా జీవితంలో ఉన్నవారు ప్రజాస్వామ్యాన్ని, పౌరులందరి ఓటు హక్కులను కాపాడటానికి అందుబాటులో ఉన్న ప్రతి అవకాశాన్ని ఉపయోగించు కోవాలని శివకుమార్ అన్నారు. ఓటు హక్కు ప్రాముఖ్యతను నొక్కిచెబుతూ అది ప్రజల జీవితాలకు ప్రాథమికమైనదని, ప్రతిపక్ష నాయకులు ప్రజల గొంతుకగా పని చేస్తున్నారని శివకుమార్ అన్నారు. ఓటు హక్కు మన జీవించే హక్కు. అదే మన జీవితం. ప్రతిపక్ష నాయకులు దేశ ప్రజల గొంతుకగా పని చేస్తున్నారు. ప్రజాస్వామ్యంలో ఏదైనా జరగవచ్చు అని ఆయన అన్నారు.
