త‌మిళ చ‌ల‌న చిత్ర ప‌రిశ్ర‌మ‌కు సీఎం ఖుష్ క‌బ‌ర్

చెన్నై : ప్ర‌ముఖ న‌టుడు, ముఖ్యమంత్రి విజయ్ నేతృత్వంలోని తమిళనాడు ప్రభుత్వం తమిళ చిత్ర పరిశ్రమకు బిగ్ రిలీఫ్ క‌లిగించేలా ప్ర‌క‌ట‌న చేశారు. థియేటర్ ప్రదర్శనలపై ఆంక్షలను సడలించింది. కొత్త సినిమా విడుదలైన మొదటి వారంలో రోజుకు ఆరు షోల వరకు ప్రదర్శించడానికి థియేటర్లకు అనుమతి ఇచ్చింది. సవరించిన నిబంధనల ప్రకారం థియేటర్లు ఉదయం 6 గంటల నుండి తెల్లవారుజామున 2:30 గంటల వరకు షోలను నిర్వహించవచ్చు. ఈ నిర్ణయం వల్ల విడుదలైన మొదటి వారంలో కొత్త సినిమాలను చూసేందుకు ప్రేక్షకులకు మరిన్ని అవకాశాలు లభిస్తాయి. భారీ బడ్జెట్ చిత్రాలకు , అత్యంత ఆసక్తిగా ఎదు రుచూస్తున్న సినిమాలకు ప్రయోజనం చేకూరుతుందని భావిస్తున్నారు.

2023లో అజిత్ కుమార్ నటించిన ‘తునివు’ సినిమా విడుదల సందర్భంగా ఒక థియేటర్ బయట దురదృష్టవశాత్తు తొక్కిసలాట జరిగింది. ఈ సంఘటన తరువాత తమిళనాడు ప్రభుత్వం ప్రత్యేక తెల్లవారుజాము ప్రదర్శనలపై ఆంక్షలను ప్రవేశ పెట్టింది. థియేటర్లలో రోజుకు నాలుగు షోలకు మాత్రమే పరిమితం చేశారు. అయితే ముఖ్యమంత్రి విజయ్ నేతృత్వంలోని కొత్తగా ఏర్పడిన ప్రభుత్వం ఇప్పుడు ఈ నిబంధనలను సడలించాలని నిర్ణయించింది. తాజా నిర్ణయం ప్రకారం, ఒక సినిమా విడుదలైన మొదటి ఏడు రోజులలో థియేటర్లు రోజుకు ఆరు షోల వరకు పెంచుకోవచ్చు.