తెలంగాణ‌లో బ‌డుల కంటే బెల్టు షాపులే ఎక్కువ‌

హైద‌రాబాద్ : తెలంగాణ రాష్ట్రంలో ప్ర‌భుత్వ బ‌డుల కంటే మ‌నుషుల ఆరోగ్యానికి భంగం క‌లిగించే బెల్టు మ‌ద్యం షాపులు ఏకంగా 2 ల‌క్ష‌లు ఉన్నాయి. ప్రతి గ్రామంలో 5 నుండి 10 అక్రమ మద్యం దుకాణాలు ఉన్నాయి. తెలంగాణలో జరిగే మద్యం అమ్మకాలలో 20% బెల్ట్ షాపుల వాటానే ఉంది. ఆదాయాలపై దృష్టి సారించి ఎక్సైజ్ విభాగం చూసీ చూడనట్లు వ్యవహరిస్తోంది. రాష్ట్రంలో కేవలం 2,620 లైసెన్స్ పొందిన మద్యం దుకాణాలు మాత్రమే ఉన్నాయి. మద్యం అమ్మకాల ద్వారా వచ్చే ఆదాయాన్ని పెంచుకోవడంపై రాష్ట్ర ప్రభుత్వం సంకుచిత దృక్పథాన్ని అవలంబించడం వల్ల, బెల్ట్ షాపులపై చర్యలు తీసుకునే విషయంలో ప్రొహిబిషన్, ఎక్సైజ్ అధికారులు చూసీచూడనట్లు వ్యవహరిస్తున్నార‌నే ఆరోప‌ణ‌లు ఉన్నాయి. లైసెన్స్ పొందిన మద్యం దుకాణాలకు , రాష్ట్ర వ్యాప్తంగా పుట్టగొడుగుల్లా పుట్టుకొస్తున్న బెల్ట్ షాపుల ఉనికికి మధ్య పెరుగుతున్న సంబంధాన్ని పరిగణనలోకి తీసుకుంటే, సమాధానం అవుననే చెప్పవచ్చు.

తెలంగాణ రాష్ట్రంలో ప్రతి సంవత్సరం మద్యం అమ్మకాల ద్వారా పెరుగుతున్న ఆదాయాన్ని పరిశీలిస్తే, మొత్తం మద్యం అమ్మకాలలో దాదాపు 20 శాతం వాటా బెల్ట్ షాపులదేనని అధికారులు చెబుతున్నారు. ఆదాయం ఒకవైపు ఉండగా, ఇళ్ల దగ్గర, విద్యాసంస్థల సమీపంలో ఉన్న అనధికారిక మద్యం విక్రయ కేంద్రాల ద్వారా మద్యం సులభంగా లభించడం వల్ల యువత చిన్న వయసులోనే మద్యానికి బానిసలవుతుండటం పెద్ద ఆందోళన కలిగించే అంశం. మద్యం అమ్మడానికి అనుమతి ఉన్న మొత్తం 2,620 లైసెన్స్ పొందిన మద్యం దుకాణాలతో పాటు, రాష్ట్ర వ్యాప్తంగా గిరిజన కుగ్రామాలు, గ్రామాలు, పట్టణాలతో పాటు అన్ని మున్సిపల్ కార్పొరేషన్లలో రెండు లక్షలకు పైగా బెల్ట్ షాపులు (అనధికారిక మద్యం విక్రయ కేంద్రాలు) ప్రతి తాగుబోతుకు ఇష్టమైన మద్యాన్ని సరఫరా చేస్తున్నాయి. లైసెన్స్ పొందిన మద్యం దుకాణాలు నిర్దిష్ట సమయాల్లో మద్యం అమ్మితే, బెల్ట్ షాపులు మాత్రం ఇరవై నాలుగు గంటలూ అమ్ముతున్న‌ట్లు ఆరోప‌ణ‌లు ఉన్నాయి.