హైదరాబాద్ : వంద సంవత్సరాల జీవితాన్ని వేలాది మంది జీవితాలకు మార్గదర్శకంగా మార్చిన గొప్ప గురువు ఐ.టి. రామయ్యా మాస్టర్ అని కొనియాడారు మాజీ సీపీ వీసీ సజ్జనార్. ఆయన తన బోధనను తరగతి గది నాలుగు గోడలకే పరిమితం చేయలేదు; సమాజాన్నే తన పాఠశాలగా చేసుకున్నారు. ఆయన 100వ జయంతి సందర్భంగా మాస్టర్ను కలుసుకుని ఆయన ఆశీస్సులు అందుకున్నారు. సుమారు 26 సంవత్సరాల క్రితం తాను జనగాం ఏఎస్పీగా పనిచేస్తున్నప్పుడు, ఆయన స్వగ్రామమైన పాలకుర్తిలో మా పరిచయం మొదలైందని తెలిపారు. ఆ తర్వాత, అవిభక్త వరంగల్ ఎస్పీగా , వందేమాతరం ఫౌండేషన్ సేవా కార్యక్రమాల ద్వారా మా బంధం మరింత బలపడిందని అన్నారు . తాము విద్యానగర్లోని ఆయన ఇంట్లో తరచుగా కలుసుకునే వాళ్ళం కాబట్టి, ఆ ఆత్మీయత దశాబ్దాలుగా కొనసాగుతూనే ఉందన్నారు.
విద్య అనేది ఖర్చు కాదు, భవిష్యత్తులో పెట్టే పెట్టుబడి అని ఆయన ప్రకటించారు. ఆయన విద్యార్థులలో పరిశోధనా స్ఫూర్తిని, సరిగ్గా ఆలోచించే అలవాటును పెంపొందించారు. ఆయన చేతిలోని సుద్ద, నేరరహిత సమాజ నిర్మాణంలో ఒక నిశ్శబ్ద విప్లవాన్ని తీసుకు వచ్చిందని ప్రశంసలు కురిపించారు వీసీ సజ్జనార్. తాను పెంచి పోషించిన విద్యార్థులనే తన నిజమైన సంపదగా భావించి, విద్యా రంగానికి నిజమైన కుబేరుడిగా నిలిచారని అన్నారు. వయసు అనేది శరీరానికి సంబంధించిన విషయమే కానీ, మనసుకు కాదు అని నిరూపించారన్నారు. జీవితాంతం నేర్చుకునే విద్యార్థిలా, ఆయన సమాజ సమస్యలకు పరిష్కారాలు సూచించడం ఆశ్చర్యకరం.
ఐఐటి రామయ్యా మాస్టర్ నేటి విద్యా రంగానికి ఒక మార్గదర్శిగా నిలుస్తున్నారు. ఆయన మరిన్ని సంవత్సరాలు సంపూర్ణ ఆరోగ్యంతో, దీర్ఘాయువుతో జీవించాలని, రాబోయే తరాలకు స్ఫూర్తిగా నిలవాలని నేను మనస్ఫూర్తిగా కోరుకుంటున్నానని తెలిపారు.




