బెంగ‌ళూరు : తమిళనాడులో విజయ్ లాగే కర్ణాటకలో దర్శన్ ఉంటారంటూ బాంబు పేల్చారు న‌టి అశ్విని గౌడ . ఇవాళ ప్రాంతీయ మీడియాతో మాట్లాడారు. ప్రస్తుతం తమిళనాడు ముఖ్యమంత్రిగా ఉన్న నటుడు సి. జోసెఫ్ విజయ్ బాటలో కన్నడ చిత్ర పరిశ్రమ నుండి ఎవరు నడవగలరని అడిగినప్పుడు ఆస‌క్తిక‌ర స‌మ‌ధానం ఇచ్చారు. అశ్విని గౌడ దర్శన్ పేరును సరైన ఎంపికగా పేర్కొన్నారు. బిగ్ బాస్ కన్నడ 12 కంటెస్టెంట్ గా ఉన్నారు. నటుడు దర్శన్ రాజకీయాల్లోకి రావాలని నిర్ణయించుకుంటే అది మంచి ఎంపిక అవుతుందని అన్నారు. సినిమా , రాజకీయాలు వేర్వేరు. చిత్ర పరిశ్రమకు చెందిన వారికి ఆసక్తి ఉండి, రాజకీయాల్లోకి రావడానికి మిగిలినవన్నీ వదులు కోవడానికి సిద్ధంగా ఉంటే, వారు అలా చేయాలని తన అభిప్రాయం వ్య‌క్తం చేశారు అశ్విని గౌడ. దర్శన్ రాజకీయాల్లోకి వస్తే మంచి ఎంపిక అవుతారని నేను భావిస్తున్నాను. ఆయనకు శుభాకాంక్షలు అంటూ పేర్కొన్నారు.
కర్ణాటక భూమి, భాష , సంస్కృతిని రక్షించడానికి తమ జీవితాలను అంకితం చేసిన నాయకులలో కన్నడ ఉద్యమకారుడు టి. నారాయణ గౌడ ఒకరని అశ్విని ప్రశంసించారు. 2028 అసెంబ్లీ ఎన్నికల్లో పోటీ చేసే ఆలోచన ఉందా అని అడిగినప్పుడు, అటువంటి నిర్ణయం తీసుకోవడానికి ఇంకా చాలా సమయం ఉందని ఆమె అన్నారు. నేను రాజకీయ పార్టీలో చేరుతానా, ఏ పార్టీని ఎంచుకుంటానా అని ప్రజలు తరచుగా అడుగుతుంటారు. ప్రతిదానికీ ఒక సమయం ఉంటుంది. ఒకవేళ నాకు అవకాశం వస్తే, అప్పుడు నిర్ణయం తీసుకుంటాను అని ఆమె చెప్పారు. బిగ్ బాస్ కన్నడ 12లో తన తోటి కంటెస్టెంట్ అయిన గిల్లి గురించి కూడా ఆమె మాట్లాడారు; షోలో వారి మధ్య పోటీ ఉన్నప్పటికీ, వ్యక్తిగతంగా ఎలాంటి ద్వేషం లేదని ఆమె పేర్కొన్నారు.
